Shillong, Jylliew, 18: Ki nongshong Shnong jong ka Shnong mawlat, ka shnong kaba hap hapoh ka Mawkynrew Community and Rural Development Block ki la im rit mynsiem hadien ka jingtwa khyndew kaba jur na ka daw ka jingther jong u lapbah uba jur mynta la jan shitaiew kynthih.
Katkum ka jingïathuh jong u Chairman ka Synjuk ki Rangbah Shnong Mawlat Area u Bah Maron Suting, la ong ba u lum uba heh u la twa kynsan ha ka sngi Thohdieng mynta ka taiew kat haduh ba ka surok PMGSY ka la shah tap ha ka jingtwa khyndew bad kaba la wanrah ruh ïa ka jingsahkut ki kali kiba la thmu ban rung shapoh ka shnong.
U la ïathuh ba ki nongtrei jong ka tnat PWD haduh mynta ki dang trei shitom ban khat ïa ka khyndew kaba la twa hapdeng surok khnang ban pyllait ïa ki kali ba la sahkut khnang ba kin ïoh rung shapoh ka shnong.
Shuh shuh u la pyntip ruh ba ki don ki iing jong ki briew kiba la julor na ka jingtwa jong une u lum ha kane ka shnong na ka jingther jong u lapbah naduh ka 12 tarik mynta u bnai.
“Wat ki kali puhshilum ba la phah da ka tnat PWD haduh mynta kim pat lah satia ban pynkhuid ïa ka jingtwa ka khyndew namar ka jingjur shaba palat ka jingtwa,” u la ong.
U la ong ruh ba ki nongshong shnong jong ka shnong Mawlat ki la rit mynsiem bad kim ïoh thiah ïoh dem shuh ha ka rukom kaba dei na ka daw ba ka shnong Mawlat ka don hajrong u lum.
“Ïa mynta ki longïing kiba don ha ka shnong Mawlat ki la hap ban kynriah jaka sah sha ki ïing jong ki bahaing hasem kiba kham shngaiñ,” ong une u Chairman ka Synjuk.
“Ngi kyrpad ïa ki bor sorkar ba kin ïarap lem ïa ka shnong jong ngi kaba la mad ïa kane ka jingwan lynshop jong ki bor ka mariang khnang ban ïada ïa ka jingim jong ki paidbah ha kane ka shnong,” la kyrpad u Bah Maron Suting.
