Nongpoh, Naitung 15: Na ka daw ka jingbteng jong u slap ban hap ha kine ki sngi, bun ki lum ki wah ki la synjor bad kawei na ka jingjia kaba la buh jingma ïa ki paidbah ba leit ba wan, ka dei ka jingtwa kynsan u lum bad ka khyndew kaba la jia mynta ka sngi ha ka surokbah National Higway-6 ha Ri Bhoi.
Kane ka jingwa u lum bad ka khyndew, ka dei hapoh ka shnong Pahamrynñai ha Ri Bhoi, ba hap ha ka surok National Highway-6 ha Ri Bhoi bad kumba la ioh lum jingtip ym shym la don kano kano ka jingjia ba sngewsih bad lait noh ka jingdheng kali ba shipor ha kane ka surokbah.
Na ka daw ba la thud ki paidbah ha ka leit ka wan, ki bor ba dei peit ka National Highway Authority of India bad ruh ki bor Pulit ka Ri Bhoi na ka Nongpoh Traffic Brach, tang mar ïa ioh jingtip, ki la hiar mardor sha katei ka jaka na ka bynta ban pynkhuid ïa ki dieng bad ki khyndew ba la twah ha ka surokbah, kiba la tap ruh ïa ka surok. Shipor ka la don ka jingdheng kali ba la hap ban pynïaid ïa ki kali paidbah tang na shiliang ka surok (Wrongside) katba ki bor ba dei peit ka NHAI bad Pulit ki dang pynkhuid ïa kitei ki bynta jong ka suork ba la twa lum bad ki dieng.
Kum ban pynpaw na ka bynta ki paidbah ba ki hap ban long kita kiba peitngor, ki jingwa lum bad twa khyndew ka la jia na ka por sha ka por haba don ka jinghap slap kaba jur bad ki bynta ba shaid twa lum ne khyndew ki kynthup kum ha ki bynta jong ka Ladlasharai, Umran, Umsamlem, Quiñine, Umling bad kiwei kiwei ki jaka ba ki paidbah nongleit nongwan ki hap ban da peitngor, haba ki ïaid ki ieng lyngba kane ka surok National Higway-6 ha Ri Bhoi District.
