Nongpoh, Nailar, 22: Na ka jingther jong u lapbah mynta ka sngi kawei ka iing kaba dei ka iing jong ka kong Badahun Pyngrope bad u Bim Mawa kiba don 4 ngut ki khun ha ka shnong Pahammawleiñ ha Ri-Bhoi ka la shah ban syndon ha ka khyndew hadien ka jingtwa kynsan.
Kane ka jingjia ka la jia mynta ka sngi ha ka por kumba 12:30 eiei mynsngi bad donbok ha katei ka jingjia ym shym la don briew ha iing lait noh tang ka kmie kaba dang bamja kaba la mynsaw ha ki bynta ka kjat bad kumjuh ruh ha ka met bad ka iing shetja jong ki ka la pra syndon na ka jingtap ka khyndew.
Katkum ka jingbatai jong ka Kong Badahun, kane ka dei ka sien ba nyngkong ba ka lap ïa kum kane ka jingjia hynrei ka la ainguh pat ïa u Blei namar ym shym la don ka jingduh ki mynsiem briew hynrei tang ki jingdon jingem kiba la poi shaduh ar lak tyngka eiei. Ka la kyrpad ruh ïa ki seng bhalang bad ki bor sorkar ba kin ïarap lem hadien katei ka jingjia ba kin ïoh ban shna pynbha biang ïa katei ka iing.
U Rangbah Shnong, u Bah Kyrngun Sylliang, u la kyrpad ïa ka sorkar bad ki nongmihkhmat ban shimkhia lem bad ai jingïarap ne jingkyrshan na ka bynta kane ka longïing kaba la shah ktah ha katei ka jingjia bad kum ka Dorbar Shnong kan ïaleh katba lah ban ïarap ïa katei ka longiing katba lah ka bor.
