Shillong, ïaïong 04: Ka jingjur jong u slap ha kine ki sngi baladep, ka la wanrah ka jingtwa jong ki surok, ki lyntri ki syngkien bad kumjuh ruh ka jingjulor jong ki iing ki sem na ka daw ka jingtwa khyndew.
Ha kane ka jingjia arngut ki briew ki la khlad ha ka jingtwa jong ki ïing ha ki shnong kiba don ha Mawkynrew C& RD Block.
Napdeng ka jingpynjulor ki bor ka mariang, kaba jingjulor kaba kham jur kadei kaba la jia ha ki thaiñ Mawkynrew, ha kaba hynriew tylli ki ïing ki la julor, ar tylli ki dukan bad kumjuh ruh ka ïingdorbar Shnong kaba rim, ki la khyllem na ka jingtwa khyndew ha ka Shnong Thangbnai bad Umblai.
Kaba kham sngewsih ka long ba kane ka jingjia ka la shim ruh ïa ka jingim jong ki arngut ki briew katba ki dang don ha ka lynti ban wan kiew sha Shillong na ka bynta ka jingdonkam jong ki.
Kine kiba la khlad ki long u Rohit Kshiar 14 snem ka rta an ka Shnong Mawlat bad ka Kong Dilibon Tangsang, 35 snem ka rta na Mawkria.
Ki ïing kiba la julor ki long ka ïing i Kong Jamin Surong, Judia Nongrum, Kristina Nongrum, Kyrkhu Longshiang, Hame Bina, ha kaba u la mynsaw na ka jingtwa ka ïing. Nangta ha Umblai kadei ka ïing u Kro Kshair bad u Phrangki Khongjoh.
La ïathuh ba u Rohit bad i Kong Dilibon, ki la mih na ïing ban wan sha Shillong, hynrei namar ka jingtwa surok bad ym lait shuh ban lait kali, ki la wanphai noh sha ïing da kaba ïaid da ka kjat. Dei hamar katei ka [pr ba ki dang ïaid kjat kynsan kynsan ka la don ka jingtwa khyndew bad ka la rong artad ïa ki. Kine ki arngut ki long iwei I Kynthei na ka Shnong Mawkria bad uwei pat u shynrang udei na ka Shnong Mawlat.
Kum ka jingïaleh ban leit wad ïa kine kiba la shah rong ha ka khyndew, ki paidbah na ki 7 tylli ki Shnong, wat hapdeng ka jingjur u slap, ki la ïa mih bam leit wad ia kine kiba la shah shah rong khyndew.
Halor kane ka jingjia, na ka liang ka Synjuk ki Rangbah Shnong, lyngba u Chairman, u Bah Maron Suting, u la pyntip kyrkieh sha u BDO jong ka Mawkynrew Block ban wad ki lad jingïarap kaba kyrkieh na ka bynta kine ki lanot ba ïakynduh ïa kane ka jingeh. Ha kajuh ka por ka Synjuk ka pyntip ruh ba namar ka jingjur u slap ki dang bun ki shnong bad ki ïing ki sem kiba don ha ka jingma lada u slap um sangeh.
Ka Synjuk ka kyntu ruh ïa ki paidah ba kin long kiba husiar bad phikir ialade hapdeng kane ka jinglynshop ki bor ka mariang, khnang ban lait na kino kino ki jingma jingmynsaw.
Ha kane kajuh ka sngi, ka la don ruh ka jingtwa ka surok ha Rngaiñ ha ka lynti ban leit na Shillong, Pynursla sha Dawki. hajan ka Shnong Siatbakon. Kane ka jingtwa ki maw bad ka khyndew ha ka surok ka la ktah ïa ka leit ka wan sha Pynursla bad Dawki, namar ba ka la khang lynti ïa ka surok. La ïohi ruh ba kawei ka Maruti Alto 800, kaba la ïaid na katei ka surok, ka la lait da ka said haba ka la jan shah ban ha ki maw bad sha rtah shapoh riat syndon.
Ki don ki khynnah ba leit thoh eksam kiba la sahkut ha kane ka jingtwa surok, hynrei na ka liang ki Pulit ki la ai jingïarap ïa ki.
Sa kawei pat ka jingtwa kadei kaba la jia hapdeng ka nongbah Shillong, haba ka surok ba leit na Wahingdoh sha Lawmali, ka la twa harud ka wah Umkhrah. Kane ka surok kadei mar pyrshah bad ka skul Synjuk Wahingdoh, ha kaba ka la twa ha shi lynter jong ka wah, kaba la ker bha da ki jar nar ban lat na ka jingbret ñiut pathar ki paidbah.
Ka jingtwa jong ka surok, ka la wanrah ka jinglyngngoh ïa kiba bun, namar la katta snem ba shlei ka wah Umkhrah, ka surok kaba ïaid na syndah jong ka, kam ju twa satia. La antad ba kane ka jingtwa ka surok harud kane ka wah, ka lah ban dei namar ka jingpyndonkam da ki kor ki bor ne ki JCB ban khlong ïa ki jakhlia ha ka por ba pynkhuid ïa kane ka wah bad ka la wanrah ka jingshong synjor ka khyndew bad ki maw hapoh kane ka wah, kaba la wanrah ka jingtwa ïa ka surok harud jong ka wah.
Nangta shuh shuh ki paidbah ki la pyntip ba ka la don ka jingtwa surok ha ki thaiñ Mawshuit namar kane ka jingjur palat u slap, ha kaba ki surok kim long shuh ban ïaid kali bad ki paidbah ki la hap ban ïa nih da ka kjat.
Nangta ka la don ruh ka jingrwa surok ha ka lynti na Mawphlang sha Balat kaba hap ha Mawsynram C&RD Block.
Ki bor sorkar ki la pyntip ba la bthah ïa ki tnad treikam kum ka PWD, ka MeECL, ki ophis BDO ban ai jingïarap ba kyrkieh sha ki lanot ba ïakynduh ïa kane ka jingjia.
