Nongpoh, Naitung 01: Na ka daw ka jingjur slap palat ha kine ki sngi, ka khyndew kaba la synjor mynta ka sngi ka la twa kynsan ha Umran Dairy, ba hap ha ka National Highway-6 ha Ri Bhoi bad ba la wan rah ka jingdheng ki Kali paidbah kiba la sahkut na kane ka jingtwa khyndew.
Ha kum kane ka por, ki paidbah ki hap ban husiar ha ka leit ka wan lyngba kane ka surok National Highway-6 ha Ri Bhoi, namar ym lah ban tip ioh don kano kano ka jingtwa khyndew ne khyllem dieng, kaba long ka jingma ïa ki paidbah nongleit nongwan lyngba kane ka surokbah ha Ri Bhoi.
Kumba la ioh lum jingtip, la ong ba kane ka jingtwa khyndew ka la jia hynne ka step, ha kaba ka khyndew ka la twa sha ka surok bad la wan rah ruh ka jingdheng kali bad na ka liang ki bor pulit ka Ri Bhoi ki la shim khia ban pynlait na ka jingdheng kali, da kaba ki la pynlait noh tang shiliang ka surok ban ïaid ki kali paidbah, khnang ba kan nym wan rah kata ka jingdheng kali kaba ktah ïa u nongleit nongwan lyngba kane ka suorkbah.
Shuh shuh, la ong ruh ba na ka liang ki nongtrei ka NHAI ruh, ki la shim khia mardor ban pynkuid ïa katei ka khyndew kaba twa na ka bynta ban lait na ka jingpynthud ïa ki paidbah ha ka leit ka wan bad ruh ka jingpynkhuid ïa katei ka khyndew ba twa ka dang ïaid shakhmat da ki nongtrei ka NHAI, ong ka tyllong khubor.
