Mawkyrwat, Jylliew, 16: Hadien ka jingwan jong u slap uba jur ha kine ki sngi ka la pynlong ïa ka khyndew ba kan shong synjor bad jem ha kaba tang shu wan u slap uba jur bun tylli ki jaka ki la twa bad khang ruh ïa ka leit ka wan jong ki paidbah nongshong shnong la ka long ïa kiba thmu ban leit sha Shillong ne wat sha Nongstoiñ ruh.
Lah ban kdew ba ha kane ka jingjia twa khyndew jong ki surok ka jia ha kiba bun tylli ki bynta kata ha ka surok kaba dei ïaid na Wahkaji – Mawkyrwat, Mawkyrwat – Shillong, ha ka surok Nongkulang, Wahblei kaba dei hapoh Ranikor Block, ka jingkhang lynti da u maw ha Uriawdang (hajan Nonglynkien), Mawtangor, Pongkung, East Khasi Hills District bad ha kiwei kiwei de.
Hahlor kine ki jingtwa khyndew na ka liang ka ophis PWD (R) jong ka Mawkyrwat Division ha ryngkat kiwei pat ki tnad treikam kiba hapoh jong ka South West Khasi Hills District lyngba ki kontraktor ki la phah noh da ki Puhshilum (JCB) ban pynkhuid noh ïa ki khyndew kiba long ka daw jong ka jingsahkut ki kali.
