Jowai, Jylliew 12: Ka jingbteng jong ka jinghap u slap da ki bun kynta, hynnin ka sngi kala wanrah ïa ka jingtwa ka surok kaba leit na shnong Chyrmang sha Ïongnoh West Jaiñtia Hills District.
Kat kum ka tyllong khubor ba la ïoh lum la ïathuh ba kane ka jingjia twa khyndew ka la jia hynnin ka miet na ka jingther u slap ba jur bad katei ka surok kala twa noh ha ka jaka ba la khot ka urpamra.
Halor kane ka jingjia la don kawei ka kali maruti Car 800 kala shah rong lang shapohka riat haka por ba twa ka khyndew, hynrei donbok ba u nongñiah katei ka kali ula lait im bad mynsaw malu mala.
Na ka liang ki briew jong ka tnad PWD bad ki pulit kila leit jurip ïa katei ka jaka khnang ba ïoh leh ïa kaba donkam bad ban lait na ki jingthut ha ka leit ka wan jong ki paidbah.
