Nongpoh, Naitung 17: Ka ïai bteng ka jinghap slap ha them Ri-Bhoi ka la pynlong ïa kiba bun ki jaka ban twa khamtam ki lum ha surokbah NH-6 kaba la buh jingma ruh ïa ki paidbah nongleit nongwan.
Dang ha kine ki khyndiat sngi, ka jingjur u slap ka la pynlong ïa ka thaiñ Patharkhmah ban mad ïa ka jingshlei um ba nyngkong hadien bun snem ha kaba ka um ka la poi haduh tyngkong iing bad ha ka sngi Balang ka la don ruh ka jingtwa khyndew ha ka thaiñ 17 mer Pahamlang ha kaba ka khyndew ka la twa ha kawei ka Petrol Pump kaba don harud ka surokbah National Highway.
Ha ka jingtwa jong ka khyndew la sakhi ruh ba ka petrol pump ka la ap jingma lypa na ka jingtih khyndew hynrei na ka jingbteng ka jinghap slap ka khyndew ka la hap mynta ka sngi sha Petrol Pump bad donbok ba ym shym la don ba mynsaw.
Ka ka jingtwa khyndew ka jia ruh ha shilynter jong ka surokbah National highway ha kaba ki paidbah ba leit ba wan ki hap ban husiar namar ka jingbteng ka jingther u lapbah.
