Khliehriat, Jymmang, 11: Da ki spah tylli ki kali ki la sahkut ha ka dheng kali ha surokbah NH-6 na ka daw ka jingtwa khyndew kaba jur bha ha ka surok bah NH-6 ha ka thaiñ Dona Skur, East Jaiñtia Hills District.
Ka jingtwa jong ka khyndew ka long kaba jubor bha namarba ka la khang sbak wat ïa ka surok kat haduh ba ki kali kiba kiew bad kiba hiar kim lait shuh ban ïaid lyngba na ka surok NH-6.
Ki Pulit ki la ïathuh ba ka jingtwa jong ka khyndew ha Dona Skur bad ha kiba bun ki jaka ha ka thaiñ Narpuh ka dei na ka jingther jong u lapbah uba jur ha ka sngi u Blei.
Ki Pulit ka East Jaiñtia Hills ki la hap ban khang shipor ïa ka leit ka wan jong ki kali khnang ban ïoh pynkhuid ïa ka khyndew bad ïa ki maw kiba la twa hapdeng surok.
Ha kawei pat ka liang, la la lap bad sakhi ïa ka jinghap khyndew kaba jur bha ha surok NH-6 ha Sonapyrdi bad ki nongshong shnong ka thaiñ ki la ïathuh ba ka jinghap khyndew ka la jia mynta la kumba lai taiew katba ki bor ba dei peit jong ka National Highway Authority of India (NHAI) haduh mynta kim pat lah satia ban pynkhuid ïa ki maw bad ka khyndew kaba hap ha surok.
La lap ruh ba ha ka bynta jong ka surok NH-6 ha Sonapyrdi ki kali ki lah ban ïaid tang shiliang na ka daw ka jingwit jong ki maw bad na ka jinghap ka khyndew.
Ka jingbym shimkhia jong ka NHAI ka la pynsuhsat wat ïa ki nongñiah kali bad ïa ki nongleit nongwan.
