Shillong, Naiwieng 24 : Ka jingtwa khyndew kaba shyrkhei kala jia ha ka thaiñ Laitlyngkot-Lyngkyrdem jong ka surok Shillong-Dawki, hajan ka shnong Pomlum hynne ka sngi Nyngkong, kaba la jia na ka jingpyntrei ïa ka surok.
Ki borkhmih kila hiar sha kane ka jaka ban pynkhuid ïa ka khyndew, hynrei ka jingïaid lynti kaba shngaiñ ka lah ban nang shim por sa katto katne por, ong u Addl Deputy Commissioner, Pynursla Bah EL Warjri.
U ADC ula kyntu ïa baroh ki nongleit nongwan ba kin long kiba ïai shah bad ïatreilang bad ki bor khmih namar ka jingpyrshang kala ïaid shakhmat ban pynkhuid ïa ka khyndew kham kloi kat kaba lah.
