Shillong, Ïaiong 01: Da ka jingbitar ki longkmie jong ki khynnah skul kila ïa mih paidbah ban tur sha Secretariat halor ka jingsangeh noh ki bus jong ka MTC ban ai ka jingshakri kiba ju kit ïa ki khynnah skul, hynrei kila shah khang lynti noh tang shu poi ha khyrdop.
Kine ki longkmie kiba la leit ban tur sha Secretariat ki don kumba shi spah ngut tam bad kane ka jingleit tur kadei halor ka jingbym ai ïa ki bus wat lada ka sorkar kala dep ban thied.
Haba la shah bat ha khyrdop jong ka Secretariat la don ka jingïakren sngewthuh ba la shah ia ki katto katne ngut ki kmie jong ki khynnah skul ban leit ïa kynduh ïa u Chairman bad u Managing Direector jong ka MTC.
Ha kane ka jingleit ban ïa kynduh na ka liang jong ki heh ka tnad MTC kim shym pat lah ban shim ïa kano kano ka rai hynrei kila pynpaw ba mynta ka sngi ka 2 tarik u ïaiong kin shong jingialang jong ka board meeting.
Na ka liang ka kong Sony Kharjana kaba dei kawei na ki kmie jong ki khynnah ba ju pyndonkam da ki bus na ka bynta ki khun haba leit sha skul kala ïathuh ba na ka liang u MD u la pyntip sha ki ba hadien ka board meeting kin sa khot biang ia ki ha ka por 3 baje ban pyntip ia ka rai jong ka jingialang.
