Tur kyndit bad rah plakad ka KSU bad ki sengbhalang sha ophis u Syiem ka Hima Maharam
Ban pyrshah ïa ka jingai jaka sha ki shipai BSF
Mawkyrwat, ‘Nailar 31: Ka Khasi Students’ Union (KSU), South West Khasi Hills District ryngkat bad kiwei ki kynhun sengbhalang kiba kynthup ïa ka Federation of Khasi Jaiñtia and Garo People (FKJGP), ka Hynniewtrep Integrated Territorial Organisation (HITO), ka Hynñiewtrep Youth Council (HYC), ka Hynniewtrep National Youth Front (HNYF) bad ka Hynniewtrep Achik National Movement (HANM) ha ka sngi Saitjaiñ ki la tur kyndit sha ka ophis treikam jong u Syiem ka Hima Maharam kaba don ha ka shnong Mawkyrwat, South West Khasi Hills District.
Ka jingleit tur jong ki sengbhalang ka long ban dawa ïa u Syiem ba un khot mardor ïa ka Dorbar Hima bad ban pyndam noh ïa ka jingthmu ban ai jaka sha ki shipai Border Security Force (BSF) ha ka jaka jong ka Hima kaba don hajan Wah Mula kaba hap hapoh jong ka Ranikor Civil Sub-Division, kaba la ju pyndonkam da ki khun ki hajar jong ka Hima kum ka jaka rep la bun phew snem.
Wat hadien lai kynta tam eiei, u Syiem ka Hima Maharam u Pa’iem Niandro Syiemiong um shym la mih satia na ophis jong u katba ki sengbhalang ki dang pyrta ïa ki sur pynrem pyrshah ïa u bad ïa ka Executive Dorbar jong ka Hima. Hadien kata, u Syiem u la khot ïa ki nongïalam jong ki seng ban ïakren hapoh ka kamra treikam.
Ha kaba ïadei bad kane, u President ka KSU South West Khasi Hills District, u samla Forwardman Nongrem haba kren sha ki lad pathai khubor u la ong ba ki seng ki la dawa ba ka Hima ban lum noh ïa ka jingïalang ba kyrkieh hapoh ka Lah Sngi u Blei bad ba dei ruh ban pynbna shai ba ka Hima ka la weng noh ïa ka jingthmu ban ai jaka sha ki shipai BSF.
U la ong ruh ba lada kane kam lah ban urlong, ki sengbhalang kin shim da ki lad ki lynti kiba tyngeh ban ïada ïa ka hok jong ki paidbah.
Haba kylli, u samla Forwardman u la pynshai ba ka KSU bad kiwei ki seng kim pyrshah tang ïa ka jaka ha Wah Mula, hynrei kin pyrshah ruh lada ka Dorbar Hima kan ai jaka sha kino kino ki jaka kiba ktah ïa ki khun ki hajar.
“Ka KSU lem bad kiwei ki sengbhalang ki ïengskhem ha ka nongrim ban ym ailad ïa kino kino ki jingleh kiba lah ban ktah ïa ki paidbah,” la ong u samla Forwardman.