Mawkyrwat, ‘Naitung, 03: Ki nongthang bording kiba don kumba 251 tylli ki ïing kiba hap hapoh jong ka shnong Mawkyrwat bad ki nongshong ïew ki la leit tur paidbah ha ophis jong ka Megha laya Power Distribution Corporation Limited (MePDCL), Mawkyrwat Division ba la lamkhmat da u Bah Mihsalan K. Turnia bad u Bah Skhembor W. Nongrum.
Hadien ba ki la leit mih ha ophis treikam jong ka MePDCL, na ka liang jong ki bad ki paidbah ki la shim ïa ka rai ban ai por shi taïew ban bujli thymmai ïa u Transformer uba la duh la kumba ar taïew eiei bad lada ka MePDCL kam lah ban ai bording kin sa pynlong ka jingshongkyllaiñ myngngor hakhmat ka ophis MePDCL kaba don ha Mawkyrwat.
U Bah Mihsalan haba kren ha ki lad pathai khubor u la pynpaw ka jingsngew lyngngoh haba ki leit mih sha kane ka ophis sam bording namar haba ki thmu ban ïa kynduh ki shem pynban ba ym don ki heh ophisar ha kane ka tnad ophis, ha kaba wat u Deputy Commissioner kum u khliehduh jong ka district u lah ban poi biang por kata naduh ka ka Lah Sgni u Blei ha ka por 9:00 baje mynstep u la don ha ophis.
U la ong ruh ba balei kane ka tnad ophis MePDCL ha Mawkywat Division ba lada don ka jingduh ki Transformer ka ju shimpor da ki taïew bad da ki bnai bad ki da ap haduh da wan mih ki paidbah ha ophis bad hangta ki sa kular ban phah thymmai biang ïa ki. Kumta u la buh jingkulli, kaei ka jingïapher lada siew bai bording lada pher tang shi sngi ym long hynrei lada duh transformer da ki taïew bad da ki bnai ki shu sngap mynthi? Kaei kata ka rukom treikam hapoh kane ka ophis jong ka MePDCL”? buh jingkylli u bah Mihsalan K.Turnia.
Ha kajuh ka por u la ong ruh ba ki paidbah ki sngewkmen ba tang da ki khyllip mat ba la ïohi ba la mih paidbah na ka liang ka ophis ka sa kular ban ai thymmai biang ïa u transformer, hynrei ha ki 15 sngi ba la dep haei u Transformer ba ki buh, la bynrap u Bah Mihsalan.
