Nongstoiñ, Nailur 24: Ki paid nongshong shnong jong ka shnong Ksehkohlong ki la leit ban tur sha ka ophis u Syiem ka Hima Myrïaw, ban dawa ai syrnod ïa u sordar kaba ka shnong ka la dep ban jied dang shen kata ïa u bah Amborlin Lyngkhoi.
Kumba ju leh man ka por, ka shnong ka ju buh ryntih ïa ka samoi treikam kumba lai snem kynthih. Hadien kata la ju pynlong ïa ka jingpynthymmai nongkitkam naduh u Sordar bad kiwei la bteng bad ju leh na ka por sha ka por. Hynrei wat haba ka shnong ka la pyndep katkum ka rukom pynïaid ïa ki kam jied sordar bad wat u sordar barim ruh u la dep ai ïa jingthoh iehnoh kam bad aiti ha ka ophis syiem, ka ophis ka la kyntait mardor bad kam shym la ai syrnod.
Na ka liang ki paidbah ki la ai jingthoh sha ka ophis u syiem ban dawa pynlong jingjied sordar biang da kawei sa shisien pat lada ka ophis kam sngew lah ban pdiang ïa u sordar ba la jied. Hynrei ïa kata ruh ym shym la ïoh jubab bad ka ophis u Syiem ka thung pynban da u Sordar ba shipor. Dei halor kane ka nongrim kaba la pynbitar ïa ki paidbah ban wan tur sha ka ophis Syiem kaba don ha ka shnong Nongkasen ban dawa ai syrnod noh ïa u sordar ba la jied.
Ka jingleit tur u paidbah sha ka ophis u syiem ha ka 23 tarik u Nailur 2024, ka dei ka sngi kaba u bah K. Syiem Syiem ka Hima Myrïaw u la khot ïakren ïa u bah Ïoannis Lyngkhoi sordar barim, u bah R.S. Khardewsaw u sordar ba shipor u ba la thung da ka ophis u Syiem ka Hima Myrïaw bad ïa u bah Amborlin Lyngkhoi sordar ba la jied da ki paidbah.
Pynban ha kane ka sngi ka la mih ka jjngpyrta bad ïa hylla ha ka phyllaw ka ophis u Syiem kat haduh ba ki bor District jong ka Eastern West Khasi Hills District, ryngkat ki bor jong ka aiñ ki la hap ban wan ban tem ïa katei ka jingjia bad la ïadonlang ruh naduh u bah Lasborn Marthong majistor bad kiwei kiwei ki heh pulit.
