Nongstoiñ, Risaw, 14: Ki paid nongshong shnong ka thaiñ Ri Muliang kiba kynthup ïa ki nongsynshar shnong naduh u Sordar na ka shnong Nonglang, Mawkapiah, Kyndongngei, Kyrdum, Umwahlang Umbyrsit, Mawsikar, Umwali, Umpha bad kiwei kiwei ryngkat ki paidbah, mynta ka sngi ki la leit ban tur sha ka ophis u Deputy Commissioner bad ïakynduh markhmat bad u bah Garod LSN Dyke Deputy Commissioner ka West Khasi Hills District, ban pynpaw ïa ka jingpyrshah kaba jur ïa ka jingthmu jong ki bor ba halor, ban pynkynriah noh ïa ka Ri Muliang C&RD Block office kaba don ha ka shnong Nonglang sha ka shnong Tynghor.
Ki sordar shnong jong katei ka thaiñ ba la ïadonlang ruh u bah Johnes Sohshang Secretary ka Hima Nongmynsaw Syiemship, u bah H.L.Tongkhar sordar shnong Kyrdum, haba ïakren bad ki nongthoh khubor hadien ba la wanphai na kamra u DC, ki la ong ba naduh ba la plie paidbah ïa katei ka ophis jong ka Block ha u snem 2022, ym shym la don mano mano ruh ba la pyrshah bad ba la ai jingmut da kumwei pat ha katei ka por bad baroh ki la ïa mynjur lang ban pynskhem ïa ka ban buh beit ha katei hi ka shnong Nonglang.
Hynrei, mynta ka kynti la mih kyndit kynsan sa da kiwei pat ki kynhun kiba la pyrshang ban rah noh ïa katei ka ophis sha ka shnong Tynghor. Ki la ong ba da lei lei kin ym shah ban leh kumta bad dawa ruh ba dei ban pynneh beit ha Nonglang kumba la rai naduh ka sien kaba nyngkong.
Halor katei ki kynrum kynram, katei ka kynhun ka la leit ban buh ruh da ka jingthoh hakhmat utei u ophisar u ba dei u khlieh duh ka District West Khasi Hills, ha kaba na ka liang u DC u la kular ban shimkhia bad pynsngew sha ki bor ba dei peit ïa kane ka kam.
