Nongpoh, Naitung 02: Ki nongshong shnong ka Shnong Maiong ba hap ha ka Raid Nonglyngdoh ha Ri Bhoi District mynta ka sngi ki la leit ban tur sha ka ophis PWD ha Nongpoh, kaba dei halor ka jingshah pynpra ka surok rong ba pynïasoh sha ka shnong Mawiong, kaba dei tang na ka daw ka jingpynheh ïa ka madan ïalehkai ha Pahambirthem ba hap ha ka Raid Nonglyngdoh.
Naduh ki Longkmie, ki Longkmie bad ki samla, ha ka jingïalam u Rangbah Shnong, u Bah Mathius Maring lem bad Assistant Rangbah Shnong Bah Savio Maring, Secretary Shnong Bah Repil Makri bad la synran lang ruh da u Bah Donroy Kshïar, President ka HANM Ri Bhoi ki la leit ban tur sha ka ophis PWD, na ka bynta ban pan jingshai halor kano ka Nongrim ba ki la pynpra ïa katei ka surok rong, kaba pynïasoh sha ka Shnong Mawiong.
Haba pynpaw ïa ka jingjot kane ka surok ba pynïasoh sha Shnong Mawiong, ka dei na ka daw ka jingpynpra ïa ka surok kaba don 80 Meter, kaba dei tang na ka daw ka jingpynbha ïa ka madan ïalehkai kaba don mar syndah bad katei ka surok, bad katei ka jing pynpra ïa ka surok ka la pynjynjar ïa ki paidbah ha ka leit ka wan sha katei ka shnong Mawiong.
Haba kren sha ki lad pathai khubor, u Bah Mathius Maring, Rangbah Shnong ka Shnong Mawiong, u la ïathuh ba ka la don ka jingpynheh ïa ka bynta jong ka madan ïalehkai ha shnong Phambirthem bad kum ka shnong bad ki paidbah nongshong shnog pat ki pyrshah jur, namar ki la shu pynpra ïa ka surok ban ïaid sha shnong khlem da pyntip ne pan bor na ka Shnong, kaba ki paidbah bad ka shnong ki la pyrshah jur.
U la ong ruh kane ka jingpynjot ïa ka surok ka la wan rah ka jingsyrtok ïa ki paidbah nongleit nongwan sha ka Shnong Mawiong bad khamtam ha kane ka por lyiur ba slap, namar da ka jingpynpra ïa katei ka suork ka la pynlong ktieh ïa ka surok haduh ba la jynjar ha ka leit ka wan.
Namarkata, u la bynrap ruh da kaba ong, ba ha kane ka jingkynduh ïa u SDO ka PWD Nongpoh Division, u la ai ka jingkular ban pynbha noh ïa katei ka surok bad lada ka tnad PWD kam lah pat ban pynbha kum ka bor shnong bad ki paidbah kim banse ban ïaid da ka lad kaba tyngeh na ka bynta ka jingpynbha biang ïa katei ka surok ba la shah pynpra tang na ka daw ka jingpynheh ïa katei ka madan ïalehkai phutbol ha Pahambirthem, u la bynrap.
