Shillong, Nailur 09: Ki paidbah nongshong shnong ka jylla ha ka jingïalam Ka Sur Ka Bri U Hynñiewtrep(KSKBUH) ha ka sngi Thohdieng ki la tur sha Assembly ha kaba ka jingshong dorbar Synrai jong ka jylla ka sdang ha kaba ka sorkar jylla ka la wanrah ha ka ïing dorbar ïa ka kaiphot jingshah siat ïap u Bah Chersiterfield Thangkhiew kaba la khieh da u Justice T Vaiphei.
Kine ki paidbah ki la shah bat noh ha Rilbong ha ka lad ban leit sha ïing dorbar ha kaba la don ruh ka jingpynibor kaba shyrkhei hapdeng ki pulit bad ki paidbah khamtam eh ki nongïalam ka KSKBUH. Hadien ba ki pulit bad ki majistor kim ai lad satia ïa ki nongïalam ba kin leit sngap ïa ka kaiphod wat hadien ba na ka liang ka Assembly Seceretariat ka la ai jingbit bad ka la ai ruh ïa ka Pass ba kin leit shong ban sngap ïa ka kaiphod kine ki nongilam ki ryngkat ki paidbah ki la shong hapdeng surok ban pakhang lynti ïa ki kali kiba leit ba wan.
Da ka jingsted ki pulit ki la ïoh ban tan noh ïa ki katto katne ki nongïalam kiba khang syndon sbak ïa ka kali ha kaba ka la don ka jingpyni nia kaba jur ryngkat ki jingpyrta shla ban pynrem ïa ka sorkar bad ki pulit kiba leit ban siat ïap ïa u Bah Che.
Haba kren bad ki nongthoh khubor hadien ba ka sorkar ka la pynlait paidbah ïa ka kaiphod na ka liang ki nongïalam ka KSKBUH ki la pynpaw ba kim hun satia namar ba ka sorkar kam shym la pyni paidbah ïa ka kyrteng jong ki pulit ba donkti ban leit siat ïa u Bah Che bad ba na ka liang ka sorkar kam pat shym la weng kam hynrei ka la rai ban khot hajir pynban ïa kita ki pulit.
“Lada ki seng bahlang ki shu hiar leit kyndang sha ki jaka ba wan bylla ki bar jylla ka sorkar ka la khot hajir ban set phatok syndon hynrei balei ïa kine ki pulit ka ai jem” ong u bah Donboklang Kharlyngdoh.
U la ong ruh ba lada ka sorkar bad ka tnad Pulit kim kheiñ shuh bad kim map shuh ban wan siat ïap ha iing ïa u Bah Che uba la don hapdeng ka jingpang kan long ruh kum ka khubor kaba buh jingma ïa kiwei pat kiba kwah ban wan noh sha ka miej jingïakren ïasuk.
“Lada ïa uba pang ba shitom uab ki lah ban wankem ha kano kano ka por ki jied da kane ka lynti kan long ka khubor jingmaham ïa ki dkhot ka HNLC ba ïoh kin ngat lang ha kane ka apot” u la ong.
Haba kren halor ka sienjam kaba na ka laing ka jong ki iin shim u la ïathuh ba kim pat lah ban rai eiei namar kano kano ka rai kaba ki shim ka dei beit hadien ba ki la dep syllok lang bad ka iing jong u Bah Che hynrei ki la maham lupa ba lehse kan sa mih ka jingïakhih kaba shyrkhei namar kane ka jingleh ka sorkar ka pynlong ïa ki paidbah ban rit mynsiem.
