Nongstoiñ, Nailur 12: Ha Nongstoiñ constituency ka lyer elekshon ka la sdang ban beh bad don lei lei katto katne ki jaka ba ka la sdang ban shongshit bha. Na ka liang ka All India Trinamool Congress ka la tur sha ki shnong ki thaw ban pynkhlain la ki thapniang kum ka jingpynkhreh na ka bynta ka elekshon ha u snem ban wan.
Dang ha ka taïew ba la dep ki paitbah jong ka shnong Lawse ki la khot sngewbha ïa ki nongïalam jong ka AITC, ba kin wan ban pynlong ïa ka jingïalang bad ban pynrung kyrteng ïa ki paitbah nongshong shnong na ka bynta ba kin ai ka jingkyrshan ba pura ïa katei ka party ha ka election ban wan.
La ïoh jingtip ruh ba ki nongïalam ka Nongstoiñ Block Trinamool Congress ba la synran lang ruh da u bah Macmillan Kharbani President, ki la leit sha katei ka shnong bad ki la pynlong ïa ka jingïalang ha kaba ki spah ngut ki nongshong shnong, ba kynthup ïa ki rangbah ki longkmie bad ki samla, ki la wan ban pynïasoh sha ka party kum ki nongkitkam ba pura, na ka bynta ban trei shitom ban pynjop ïa u kyrtong ka party ha ka election ha u snem ban wan.
Ki katto katne ki nongkyrshan ba skhem ka AITC ki la pynpaw ba ki kwah ban kyrshan ia ka TMC, hynrei don ruh kiba ong ba kin leit ai jingkyrshan noh ïa ka UDP lada ka pynïeng kyrtong. Haba kylli pat balei kim leit ban ai jingkyrshan noh ïa u MLA ba mynta u ba dei na ka party NPP kaba ïalam ïa ka sorkar ha kine ki snem, don katto katne kiba ong ba ki la ngiah, namar bun satang ki jingleh donbor bad baroh ki jait kam la hap ban ïaid lyngba kita ki high level.
Haba kylli pat ba balei kim leit ban ai jingkyrshan noh ïa ka Consgress kaba la don lypa ïa u kyrtong uba dei ruh u MDC ba mynta, ki don kiba ong ba lada kin leit kyrshan ïa u kyrtong ka congress ruh kam myntoi. Namar wat lada u jop ruh un ym lah ban leh ei ei namar ka Congress kam long ei ei shuh ha ka jylla ka don satang u MP katba MLA pat kam don shuh wat tang uwei ruh hapoh ka jylla.
Kumta kaba kham bha tam na baroh ka long ban rung syndon sha ka TMC, namar ka don ïa u Dr Mukul Sangma u nongïalam u ba la paw bha ha ka jylla bad u ba la long teng u Myntri rangbah haduh ar sien kynthih.
