Tuklar ka KSU ba dang bun ki jingduna ha College of Science and Commerce, Mawphlang

By Mawphor Editor On Oct 15, 2025

Shillong, Risaw, 14: Ki nongïalam ka Khasi Students Union (KSU) Mawphlang Unit ha ka sngi Baar ki la aiti da ka dorkhas ha u Myntri ka tnat Pule Puthi ka Sorkar Jylla u Bah Lahkmen Rymbui ban pynpaw ïa ki 11 tylli ki mat kiba ïadei bad ki jingdonkam jong ka College of Science and Commerce, Mawphlang.
U General Secretary ka KSU Mawphlang Unit u samla Banïengskhem Kharbani ha ka jingïakren bad ki lad pathai khubor u la ong ba ha ka jingïakren, u Myntri ka tnat Pule Puthi u la pyntip ba ka Sorkar ka ladep mang ar tylli ki bos na ka bynta College ban kit ïa ki samla pule.
“Ka jingdawa ïa ka Bus ka long ban pynsuk ïa ki samla pule namarba ka lynti ïaid sha ka jaka ba don ka College ka jngai haduh 2.30 kilomitar bad kane ka buh jingma ruh ïa ka leit ka wan namarba ka surok ka dei kaba long khlaw bad namarba ka Hostel ruh kam pat don,” ong u samla Kharbani.
U la ïathuh ba ka seng ka la pynpaw ruh halor ka jingdonkam jong ka College ïa ka umbam umdih, ka bording, ka Laboratory bad ka Library kiba long ruh ki mat ba donkam bha.
“Kumba ka long mynta ka um kam pat don watla ka tnat PHE kaba don ha Mawphlang ka dei kaba ju sam ïa ka umbam umdih sha ka nongbah Shillong baroh kawei. Katkum ka jingïathuh jong u Bah Rymbui, ka College ïa mynta ka hap ban shu thied ïa ka um ym duna 3 hajar litar shi bnai,” la ong u General Secretary ka KSU.
U la ïathuh ruh ba wat ka College haduh mynta kam pat don ïa ka bording bad ka kali ophis. “Ka Laboratory ruh kam pat biang satia ki tiar ki tar namarba ym pat don kamra. Halor kane, u Myntri u la kular ban sa pynbiang ruh ïa ka Library na ka bynta ka jingdonkam jong ki samla pule,” u la ong.
U samla Kharbani u la ïathuh ba ka seng ka la dawa ïa u Myntri ba ka tnat Pule Puthi ka dei ban thung noh ïa ki nonghikai ba pura. “Ki don 31 tylli ki post nonghikai ïa kiba ka tnat Pule Puthi ka la thaw da ka Board kaba khmih na ka bynta ka jingthungkam nonghikai,” u la ong.
“Ngi la dawa ruh ba ïa ki post Non-Teaching Staff dei ban thungkam da ka rukom kaba khuid bad suba hynrei kumba ka long mynta ïa ka post Peon, Chowkidar bad LDA la shu ai thung hi da ka tnat Pule Puthi. Hynrei ngi la dawa ba dei ban pynlong da ka jingthungkam kaba khuid khnang ba kan plie lad ïa ki nongwadkam ,” u la bynrap.