Shillong, Naitung 07 : U paidbah ba bun kynthup naduh ki paidbah nongshong shnong haduh ki khynnah skul ki la mih ban shim bynta ha ka rally ban pynrem jur halor ka jingshah pyniap ka samla Phyrnailin Kharsyntiew ha ka 30tarik u Jylliew mynta u snem.
Hadien ba la dep ka jingïa ïaid rally paidbah ban pynrem jur ïa u runar uba la shim ia ka jingim jong ka samla Phyrnailin Kharsyntiew kaba la jia ha ka 30 tarik u Jylliew 2025 ka Dorbar Shnong Wahrit Pyllun ka la ïoh ruh ban pynlong ïa ka jingïalang kaba lyngkot ha madan Dom Mawlum Pyndengumiong Mairang ha kaba la pynïaid ïa kane ka jingïalang da u Sordar ka shnong Wahrit Pyllun u Bah S.Lyngdoh Mairang.
Ha kane ka jingïalang lyngkot kiba donlang ki ynthup naduh u MDC ka Pariong Mawthadraishan Constituency Bah Powell Sohkhlet, Bah Kotbor Warjri na ka Ophis u MLA Mawthadraishan, u Sordar ka shnong Pyndengumiong Bah B Syiemiong kiwei ki Sordar shnong bad ki nongkitkam shnong na ki shnong bapher bapher.
La donlang ruh ha kane ka sngi naduh ki nongïalam jong ki sengbhalang na ki seng bapher bapher, ki seng longkmie ryngkat ka jingwan ban sakhi naduh ki longkmie, ki khynnah skul bad kiwei kiwei.
