Mairang, Naitung, 20: Ka Talent Identification Programme kaba long ka prokram ïit sap ïalehkai ba la pynlong da ka Meghalaya State Olympic Association (MSOA), ha ryngkat ka jingïatreilang ka tnat Sports & Youth Affairs jong ka sorkar jylla bad ka EDGE 10 Group, ka la sakhi ïa ka jingwan ïashimbynta jong kiba bun ki khynnah pule ka thaiñ, ha ka prokram ba la pynlong mynta ka sngi ha Madan Mot Tirot Mairang Mission, Mairang.
Ha ka jingïalang plie ïa kane ka prokram, la wan ban sakhi da u Working President ka Meghalaya State Olympic Association (MSOA), u Bah John F Kharshiïing, u Deputy Superintendent of Police (Headquarters) ka Eastern West Khasi Hills District, u Bah H.Kharkongor, u Syiem ka Hima Nongkhlaw, u Pa’iem P.M Syiemlieh, u rangïalehkai na ri Australia u ba la ju ïashimbynta ha ka lympung Olympics u Ian Campbell, ki nonghikai, ki khynnah pule ka thaiñ bad kiwei kiwei.
Kane ka prokram ïit sap ïalehkai, ïa kaba la pynlong da ka jingthmu ban lap ïa ki riew donsap ha ka kam ïalehkai na baroh khat ar tylli ki distrik ka jylla Meghalaya, ka la sakhi ïa ka jingïashimbynta ba shitrhem jong ki khynnah pule ka thaiñ, kiba la ïakhun ha ki jingïalehkai kum ka Compass Drill, Vertical Jump, 20 Meter Sprint, 10 Metre Ladder Run bad kiwei de.
