Mawkyrwat, Lber 30 : Ki paidbah riew ngeit jong ki Balang kiba hapoh ka Bible Society of India jong ka Mawkyrwat Branch hynnin ka sngi ka 30 tarik u Lber, 2025 kaba dei ka Sngi U Trai ki la ïa tuid da ki phew hajar ban pynlong ïa ka jingïaseng jong ka Annual Meeting jong ka Bible Society of India, Mawkyrwat Branch kaba shit rhem bad kaba dap jingkyrkhu bad kane ka jingïaseng la pynlong hapoh jong ka Balang Presbyterian Mawlangwir, South West Khasi Hills District.
Ha kane ka jingïaseng la buh ruh ïa ki nongkren ha ki ar tylli ki jingïaseng kata ha ka jingïaseng por 10:30 mynstep da u Pastor S.B. Lyngkhoi uba trei ha ka District Mawphanïew ha ka thaiñ Mairang bad ha ka jingïaseng por 1:30 nohphai sngi da u Pastor J.S. Thongni uba trei hapoh jong ka Rangthong Presbytery.
U Pastor S.B. Lyngkhoi ha ka jingkren jong u na ka ktien jong U Blei u la shim na ka 2 Timothi ka lynnong kaba 3 bad ka dkhot kaba 14 bad 15 ki kyntien kiba ong, “Hynrei ma me, to ïai neh ha kita kiei kiei ruh ïa kiba me la nang, bad ha kiba la pynngeit skhem ha me, da kaba tip nano me la nang ïa ki bad ba na myndang khunlung me la tip ïa kita Ki Jingthoh Bakhuid, kiba lah ban pynstad ïa me sha ka jingpynim da ka jingngeit kaba ha U Khrist Jisu”. Na kine ki ar tylli ki dkhot u la shim ruh ïa ka phang pdeng kaba ong, “Ka jingtip ïa ka Ktien U Blei ka ai ka jingstad ïa ngi ki briew”, ha kaba u la phiah ïa ka ha ki lai tylli ki bynta kiba kongsan.
Haba kren bad pynshai ïa ki mat ba kongsan u Pastor S.B. Lyngkhoi u la shim da kaba pynshai ïa ka bynta ba nyngkong ka dei ka jingtip ïa ka ktien U Blei ka ai ka jingstad ïa ngi ki briew – “ban kiar bad ieh noh noh ïa kiba sniew bad im da ka jingim ba khuid bad ba bha”, kaba ar ka long ka jingtip ïa ka ktien U Blei ka ai ka jingstad ïa ngi ki briew – “ban pynskhem ïa la ka jingngeit ha U Jisu Khrist” bad kaba lai ka long ka jingtip ïa ka ktien U Blei ka ai ka jingstad ïa ngi ki briew – “Ka long ban pynjanai ha ka jingpynim kumba U Jisu Khrist U la khot ïa ngi”.
Shuh shuh ha ka jingkren jong u Pastor S.B. Lyngkhoi u la pynkynmaw ruh ïa ki saw tylli ki kam ba kongsan ba ka Bibles Society of India ka la leh na ka bynta ban pynïaid shaphrang bad ban pynphriang ïa ka Ktien U Blei kata ka long, “Ban pynkylla ïa ka Ktien U Blei ha kiwei pat ki jait ktien bapher bapher”, kawei pat ka dei “Ban pynmih ïa ka Ktien U Blei ha ka audio”, “Ka jingsam ïa ka Ktien U Blei ha kylleng ki jaka”, bad “kaba ai sha ka kam jong U Blei ka ban long ka jingkyrshan na ka bynta ban pynpriang ïa ka Ktien U Blei”.
U Pastor J.S. Thongni ha ka Jingïaseng por 1:30 nohphai sngi la ïoh ula shim na ka Shithi U Paul U Apostol sha ki Nong Ephesus kaba 6 bad ka dkhot ba 11 kaba ong, “To kieng noh ïa ki jingkieng atiar ka jong U Blei baroh ba phi lah ban ïeng pyrshah ïa ki buit thap u Soitan” bad 1 Thesoloni kaba 5 bad ka dkhot ba 8 ki kyntien kiba ong, “Hynrei, ma ngi, haba ngi long ki jong ka sngi to ngin ïalong adkar, kiba phong ka jingïada shadem jong ka jingngeit bad ka jingieit; bad ka jingkyrmen ka jingpynim, kum ka jingïada khlieh”.
Haba kren ïa kitei ki ar tylli ki dkhot na ka Ktien jong U Blei ba u la pynshong nongrim, u Pastor J.S. Thongni u la phiah ha ki hynriew tylli ki mat ba kum ki para bangeit ki dei ban ïaid ha ka ban shakri ïa U Trai kaba bynta nyngkong ka long, “Ban long ki khristan ki la pan poh da ka jingshisha” bad la shim ban kyrshan na ka Isaiah 11:5, kaba ar, “ban long kiba la phong bad kup ïa ka jingda shadem” bad la shim ban kyrshan na ka Isaiah 59:17, kaba lai, “Ban long kiba la phong juti ha ki kjat”, kaba saw, “Ban long kiba la bat ïa ka stieh ka jingngeit ha la ki kti”, kaba san, “Ban long kiba la phong ka jingda khlieh ka jingpynim” bad la shim ban kyrshan na ka 1 Thesoloni 5:8, bad kaba hynriew ka long, “Ban long kiba la bat ïa ka waitlam ha la ka kti” bad la shim ban kyrshan na ka Hebru bad na u Amos 8:11-12.
Ha kane ka jingïaseng la ïoh ki jingrwai kyrpang na ka Balang Mawten Church of God, na ka Balang Presbyterian Wahsiej ha ka jingïaseng por 10:30 mynstep katba ha ka jingïaseng por 1:30 nohphai sngi ki long ka Balang Presbyterian Mawranglang bad na ka Balang Presbyterian Mawlangwir.
Ym tang kata, ha kane ka sngi ka la don ruh ka jingsam ïa ki syrnod sha ki nonglum ïa u synñiang jong ka Bible Society of India, Mawkyrwat Branch bad kumjuh ruh ka jingpynkup burom ïa u Pastor H.W. Nongsiej. Ha kane ka jingïaseng la ïoh ruh ka jingpyni-thuh bad pynkyntang ïa ki nongkitkam bad ki dkhot ka Executive Committee 2025 – 2026 kiba thymmai jong ka Bible Society of India, Mawkyrwat Branch.
