Nongstoiñ, Rymphang 17: Ha ka jingïalang elekshon MDC hakhmat ïew Nongstoiñ ha ka sngi nyngkong jong ka taiew, ki party bad kynhun shimet ki la pynkhih win ïa ka Nongstoiñ, ha kaba ki paidbah na kylleng ki jaka ki la sngap bad shahskhor ïa kaei kaba ki nongkren, khamtam ki kyrtong ki don ban khlei ki juban lak.
Na ka liang ka VPP u samla Dr Juristman Ïawphniaw haba ai jingkren u la ong ba ka Voice of the People Party, ka wer sha ki paidbah Nongstoiñ da ka jingkhuid sha ka lynti kaba khuid bad kumba ki paidbah ki la kyrshan ïa ka party haduh 22 hajar tam ha ka MP elekshon, mynta ruh ka party ka kyrmen ba ka sur kan nang kham jam arshah.
U la ong ba ha ka jingshisha kum u Doctor u kwah ban aiti ban shakri sha ki paidbah naduh dangrit, hynrei haba u ïoh ka lad lyngba ka VPP u angnud shuh shuh ban shakri khambha ha kiwei pat ki bynta kaba dei ha ka imlang sahlang.
U la ther ruh ïa kito kiba pynbiej paidbah lyngba ki skhim ha ki san snem, hynrei u la ong ba ka por kam dei shuh ban dang ngop, pynban ban kylla ka rukom pyrkhat bad ban peit aiu ka lawei ka ri ki khun ki ksiew ki ap. U la kren shai ba dei satang ka VPP kaba don ka jingkyrmen na ka bynta la lashai jong ka jaidbynriew.
U Bah Brightsar Marbaniang MLA na Mawlai haba ai jingkren u la ong ba ka seng VPP, ka dei tang ma ka ka party ka ban ïakhun pyrshah ïa baroh ki seng saiñ pyrthei ha kane ka elekshon MDC. U la ong ba jan baroh hi ki dei satang ki party sdien bos ki ba don ha syndah jong kane ka sorkar MDA ba la ïalam da ka NPP.
Ha Nongstoiñ mynta ka party ka donbok eh ban ïoh ïa u samla u bïang lut naduh ka kyrdan pule, khamtam u ba la ïoh ka jingshaniah ban trei katkum ki kyndon ka VPP. Ailad mynta ïa ka VPP watla ka don ha ka liang pyrshah hynrei ka dei ka party kaba pynkhih win hapoh Assembly katkum ki kam kiba ngi hap ban kren na ka bynta ka sur ki paidbah.
U la ther ruh ïa ka HSPDP da kaba ong ba hato ki paidbah kin shaniah mo ïa ka ka NPP, ha kaba ki MDC jong ka ha kine ki snem ki la kyrshan ïa ka sorkar ban aiti ïa ki jaka border sha ka Assam sha ka sorkar MDA. Hato ki briew ka Nongstoiñ kin shaniah mo namar kumba long mynta ka kyrtong jong ka HSPDP ka dei ka Vice Chairman jong ka Law Commission ka sorkar Jylla. Baroh ki dei satang ki party kiba don ha ka sorkar MDA ba la ïalam da ka NPP kum ki party sdien bos.
Ka lawei mynta ka sah sa ha ka VPP ba kan leh ei ei ïa kine ki briew kiba la leh donbor thom bor bad ki bym don ha ki, ïa ka nongrim ban trei na ka bynta ka ri bad ka jaidbynriew. Mih paidbah ha ka 21 tarik ban kyrshan ïa ka VPP bad kyrmen ba ha ka 24 tarik yn kheit ïa u soh jingjop na ka bynta ka lashai bad ka pateng ban wan, u la ong.
U kyrtong NPP bah Dressar Marngar u la ong ba ka elekshon MDC ka dei kaba kyntang, ba ki briew ki dei ban shimkhia. U la pharshi ruh ïa ka VPP da kaba ong ba kano kano ka ding kaba klang ka lip kloi bad u rnga hi dei u ba shah slem. Namarkata ki paidbah kim dei ban shit ruma ïa kiei kiei bad ki dei ban long u rnga ba rhem bad ki ïaiñeh ha kata ka jylli jong ka NPP.
U la ong ba kum u briew ba ïohi jngai u don ïa ka thong kum u nonghikai, u sngewkhia ïa ka jingngop jong ki samla ïa ki jingsniew ba bun jait khamtam u drok. U la ong ba lada la ibit ïa u ban long u dkhot ka District Council, un pynlong ïa ki jingai jinghikai sha ki dong ki thaiñ ka Constituency, ban ai ka jingïarap ïa ki khun samla kiba long ka lawei ïa ka jaidbynriew.
U Kyrtong ka seng Congress u Babu G.Ning Marthong haba ai jingkren u la ong ba dei u Maieit Hoping um shym la ailad ïa ka Congress ban jop. Hynrei ki paidbah ki dei ban sngewthuh ba ka Congress ka dei ka kmie kaba ïohi ïa ka jingdonkam jong ki nongshong shnong ha ka Jylla.
Dei ka sorkar Congress kaba ai ïa ka jylla kaba pura bad hadien ba u Maieit Hoping um don shuh ba ki paidbah ki la phai biang sha ka party Congress namar dei tang lyngba jong ka ba ka ri bad ka jadbynriew ka long kumne mynta kumba ka long.
U la ong ba lyngba ka party Congress yn sa lah ban trei biang ïa ki kam bad kan sa long ka nongkit nongbah ïa ki paidbah nongshong shnong. Ka party Congress ka don ka jingsngew skhem ba watla u Maieit um don shuh, hynrei ka party kan lah ban trei bha na ka bynta ki paidbah jong ka Nongstoiñ bad ka Jylla baroh kawei.
Kum u kyrtong u ba la mih ban ïa aireng ha kane ka Election MDC ba lada ki paitbah kin pynjop ïa u, ka thong kaba u don ka long ba un nang pynsngew sha ka Council ba kan nang pynkhlaiñ shuh shuh ïa ka synshar khaddar lyngba ki Syiem, ki rangbah shnong.
Ban pynskhem shuh shuh ïa ki aiñ kiba ïadei bad ka rukombat khyndew ha kane ka jylla khamtam eh ha ri Khasi bad Jaiñtia. Ha kajuh ka por u la ong ruh ba lada un jop un don ryngkat bad ki paitbah ha ki por baroh la ka dei ha ki jingjia ba sngewsih ne ha ki por ba ki don ha ki jingsngewbha ruh.
U Bah Dmikstar Lyngdoh na ka BJP u la ong ba ki hima Khasi ki la dep ban ïasoi ïa ka Merger Agreement bad ka sorkar India ha u snem 1948. Hynrei haduh mynta ka jaitbynriew Khasi kam pat ïoh satia ïa ka jinglaitluid ba pura.
U Bah David Kharsati u la ong ba ka um bam um dih lyngba ka JJM, ka jingpynrung ïa ki jingïarap sha sha ki account shimet ki dei ki kam ba ka Bharatya Janata Party ka la shimkhia, khnang ban lait na ka bam sap bam pong ha poh ka ri India baroh kawei.
Nalor kata ka BJP ka don ïa ka thong ba kan plie ïa ki skul ha man la ki shnong ki bym pat don skul da kaba yn siew tulop da ka sorkar ïa ki nonghikai. Ka jingkiew jong ka ri Indïa sha ka kyrdan kaba san ha ka thup jong ki ri kiba khlaiñ bor tam ha ka pyrthei, ka dei naduh ba u Narendra Modi u la shimti ïa ka kam kum u Myntri Rangbah duh jong ka ri.
Lada ki paitah kin ailad bad pynjop ïa ka BJP ha kane ka Election MDC ka la pynkhreh shait shait ban pynïoh ïa ka direct funding na ka bynta ba ka District Council kan pyntrei ïa ki kam pynroi naduh ki surok, ki skul, ki madan bad kiwei kiwei.
U Bah Dimandar Lyndoh kyrtong MDC ka BJP Nongstoiñ, u la ong ba ka jingmih madan ban ïaleh ïa kane ka MDC election, ka dei namar ba u ïohi ïa ka jingeh ki paitbah bad hadien ba u la pynïasoh bad ka BJP. Haba u leit kylleng ki jylla ha ri India ym don ba pynwwit namar haba u pyni da ka Identity Card ba ka BJP ka la ithuh ïa u kum u dkhot ba pura jong ka party yim nud shuh ban pynwit.
Nalor kata u la ong ba lada ki paitbah kin pynjop ïa u, lai sngi man la ka taïew un don ha District Council ophis ha Nongstoiñ bad lai sngi pat un leit shong ha ophis District Council ha Shillong ban pyndep ïa ki kam.
Na ka liang ka HSPDP u Bah Methodius Dkhar MLA Mawshynrut u la ong ba ka jingleit ai jingkyrshan ïa ka sorkar, ka dei halor ka dei ka jingkwah jong ki paitbah khnang ba ka jingangnud ban ïoh ïa ki kam pynroi kan urlong. Lada shong ha ka liang pyrshah kan shem shitom ban pynurlong ïa ki jingangnud ba ki paitbah ki la pynsngew shuwa ka Election.
Wat la kiwei ki kynthoh ba ki dei kiba shong ha tnum jong ka bus, hynrei kam long kumta namar haba ki leit ki ïoh ban rung shapoh bad kim shym la shoh samthïah ,hynrei ki pynshngaiñ ïa u nongñiah ba un ym samthiah haba u ñiah ïa ka bus lyngba ka surok kaba shim por haduh san snem ban ïaid.
Ka kong Badariti Lyngdoh Nonglait kyrtong MDC ka Nongstoiñ constituency, ka ong nga wan ban ïaleh elekshon na Nongstoiñ ym da ka mon jong nga hynrei ka dei ka jingkwah jong ki paitbah.
Ka election sha ka District Council ka dei kaba donkam tam bad ki don lai tylli ki nongrim ba ka angnud ban pyndep lada ki paitah kin ai ka jingkyrshan ban pynjop ha kane ka elekshon MDC. Ka mat kaba nyngkong ka long ba ka sorkar kan pyndep noh ban ithuh ïa ka ktien Khasi bad ban pynrung noh ha ka khyrnit kaba phra jong ka riti synshar.
Ka mat kaba ar ban pynjanai shuh shuh ïa ki aiñ kiba ïadei bad ka kheiñ kur kheiñ jait sha ka kmie, namar ka jaitbynriew Khasi ka dei kaba shim jait na ka kmie. Ka mat kaba lai ka long ban pynkhlaiñ ïa ka Sechedule bad ki aiñ kiba ïadei bad ka hok longtrai halor ka khyndew ka shyiap, ki khlaw ki btap bad ki marpoh khyndew. Kumjuh ruh ba kan pynurlong ïa ka jingangnud jong u (L) Maieit Hopingstone ban pynbeit ïa u pud u sam.
