Nongstoiñ, Jymmang, 8: Ka Krishi Vigyan Kendra (KVK) West Khasi Hills hapoh ka jingïalam jong I Kong LWarjri, I ba bat kum I Senior Scientist and Head, ryngkat ka jingïatreilang bad ka ophis ICAR-Indian Institute of Wheat and Barley Research, Karnal, Haryana hapoh ka jingïalam jong u Dr Satyavir Singh, Principal Scientist & Head, Social Science, ka la pynlong ïa ka awareness camp naduh ka 3 tarik haduh ka 7 tarik mynta u bnai ha Mawshynrut.
Ha ka 3 tarik la sdang shwa na ka shnong Langdongdai, West Khasi Hills hapoh ka Mawshynrut C&RD Block. Ha kane ka sngi la ïashim bynta haduh 165 ngut ki nongrep ryngkat ka jingïadonlang ki scientist na ICAR-IIWBR, Karnal bad na KVK West Khasi Hills Nongshillong. Ki paid nongrep ki la ïoh ka training ba kyrpang halor ka mat vermicomposing, paddy, soh, poultry farming, biopesticides na ka ophis KVK. Kumjuh ruh ki la ïoh pdiang ki symbai jhur, ki sboh dawai, ki dawai khñiang, ki dawai ri jingri.
Ha ka 5 bad 7 tarik la pynlong ïa ka awareness camp ha ki shnong Mawkynbat bad Phudbah bad la ïawan ïashimbynta palat spah tam ki nongrep. Ki paidbah ki la ïoh ka jinghikai bad lad jingmyntoi kum ki symbai jhur, ki sboh dawai, ki dawai biopesticides kaba dei kawei na ka lad jingïarap ïa ki nongrep na ka Ministry of Agriculture, Government of India na ka bynta ka North Eastern Hills Region.
