Khliehriat, Rymphang 19: Ki paidbah nongkyrshan kiba kyrshan ïa u kyrtong jong ka United Democratic Party, u bah Joinriwel Pyrtuh uba ïakhun na ka Bataw Lakadong Constituency, mynta ka sngi ki la ïa tuid baroh sha ka rally kaba la pynlong ha shnong Lumshken ha kaba la wan lang ruh u MLA Khliehriat, u Bah Kyrmen Shylla, u MLA barim u bah Justine Dkhar bad kiwei kiwei ki riew rangbah ban ialap election ha katei ka jaka.
U Bah Kyrmen Shylla, haba kren sha ki paidbah u la ong ba ka party mynta ka la ioh uwei u kyrtong uba don ka nongrim, u bah Joinriwell Pyrtuh uba bha bad uba kren beit ïa ka jingshisha.
Ha katei ka lympung ba long ha shnong Lumshken u bah Kyrmen Shylla u la ther tyngeh ïa u Dr Sanky Shangpung bad ong ba u dei u briew u bym don ka nongrim kaba skhem bad uba ju sngew sarong tang ïa kata ka kyrdan PhD kaba u bat, u la ong ruh ba ha ka sngi ba u Dr Sanky Shangpung u mih na ka UDP ka la long kumba u la die ïa ka jaitbynriew bad khlem kheiñ snep ïa ka jingshaniah ki paidbah kiba la pynjop ïa u ha u snem 2019 bad khlem kheiñ ruh ïa ka jingshaniah ka party UDP.
U bah Kyrmen Shylla u kyrpad ïa ki paidbah jong ka Bataw Lakadong Constituency bad kumba ki ieid bad shaniah ïa u kum u MLA ki dei ruh ban shaniah ïa u bah Joinriwell Pyrtuh ban ai ïa ki vote jong ki ha ka party UDP, namar u bah J.Pyrtuh u dei ruh uba la ju bat ruh kum u MDC haduh khatsan snem bad uba la ju ai ka jigngshakri kaba paka ïa ki paidbah ka thaiñ.
“Ngi la iohi lut ïa ka jinglong jingman jong u bah Joinriwell Pyrtuh uba la don jingtip bha ruh ïa ka District Council bad ki paidbah ruh kin ioh bun ki jingmyntoi, u dei uba la bat kum u MDC ha ki khatsan tylli ki snem, ym tang ba u wanrah ïa ka roi ka kiew hynrei ka wan ruh ka jingshaniah ha u namar kam dei shisha kaba suk ban jop lai tylli ki election dei namar ba u la ioh ïa ka jingshaniah na ki paidbah”
U bah Kyrmen Shylla u la ai khublei ruh ïa u bah Justine Dkhar uba la kloi ban ïa don lang ha kane ka lympung bad ai khublei ïa baroh ki riew rangbah kiba la wan sha kane ka rally bad kiba la ai ka jingkyrshan ïa ka party UDP.
Na ka liang u kyrtong, u bah Joinriwell Pyrtuh u la pan ïa ka jingkyrshan na ki paidbah jong ka Bataw Lakadong Constituency bad ong ba lada u jop un ioh ruh ban iatrei lang bad u MLA, u Bah Kyrmen Shylla khnang ban kham bha shuh shuh ban dup lah ban wanrah ïa ka roi ka par ha ki shnong ki thaw hapoh ka constituency.
“Nga kwah ban pyntikna ba kane ka jingieid jong phi ïa nga bad ka jingieid jong nga ïa phi kam pat shym blad bad nga khmih lynti ba katba nang mih ki sngi ki por kan nang bang shuh shuh ha kaba phi ki paidbah phin nang ai buit ai bor shuh shuh ïa nga,” ong u Bah J.Pyrtuh.
