Tuid ki paidbah ban sakhi, shongkun ka jingrakhe ïaka sngi laitluid ba 79 ha madan NSCA Pahamsyiem

Nongpoh, Nailar 16: Hapdeng ka jingiphuh iphieng ka bor district jong ka Ri-Bhoi haka 15 tarik Nailar kala rakhe ïaka sngi laitluid kaba 79 jong ka ri India ha madan NSCA Pahamsyiem ryngkat ka jingtuid jong ki paidbah na kylleng ka Ri-Bhoi ban pyndap smam ïaka madan.
Ha kane ka sngi u Bah Paul Lyngdoh Myntri ka tnad jngohkai pyrthei ka jylla u la wan ban shim bynta kum u kongsan ban kyntiew ïaka lama lai rong ka ri bad shim ruh ïaka salute bala sakhi ruh daka jingdonlang ka kong Rona Khymdeit MDC ka Nongpoh, u Abhilash Baranwal Deputy Commissioner ka Ri-Bhoi District, u VS Rathore Senior Superintendent of Police ka Ri-Bhoi bad kiwei kiwei ki heh ophisar, ki khynnah skul, ki nonghikai lem bad ki hajar ngut ki paidbah kiba la wan ban sakhi lang ha katei ka sngi.
Kumba 25 tylli ki kynhun kila wan ban shin bynta haka March Pass ba kynthup naduh ki pulit, ki skul bapher bapher, Bharat Scout and Guide.
Kum ka jingpynphuh ïa ka jingrakhe ïaka sngi laitluid ka ri naka liang ki khynnah skul naki skul bapher bapher ka Ri Bhoi kila wan ruh ban shim bynta haki jingshad bad rwai tynrai ryngkat ki jingrwai ïeid ri ban pynpaw ïaka mynsiem ïeid ri kaba rhem ha uwei pa uwei u nongshong shnong ka ri India naduh ka ioh ka jinglaitluid naka jingsynshar ki dohlieh.
Ha katei ka sngi naka liang ki bor district kila pynkup burom ruh ïaki rang bad thei ïalehkai ka district kiba la wanrah nam bad burom, lem bad ki tnad sorkar bapher bapher kiba la trei shitom ban nohsynñiang bad ban ai ka jingshakri kaba paka sha ka imlang ka sahlang.