Jowai, Rymphang 15: Ki paidbah nongkyrshan jong ka Party NPP mynta ka sngi saitjaiñ kila tuid da ki hajar sha ka jingïalap ïalap Election na ka bynta u kyrtong MDC jong ka 10 Mynsngat-Khanduli Constituency u ma Pheinshwa Nangleiñ, kaba la long haka shnong Sanaro West Jaiñtia Hills District.
Ha kane ka sngi la wan ban ai jingkyrshan lang naduh u symbud myntri rangbah ka sorkar jylla u ma Sniawbhalang Dhar uba dei ruh u National General Secretary ka NPP, nalor kiwei de ki nongïalam ba hakhmat eh jong ka party kiba la ai jingkren bad ai mynsiem ïa u kyrtong jong ka seng.
Ki nongkyrshan jong u ma Pheinshwa Nangleiñ na kylleng ki jaka kiba hap hapoh katei ka Constituency kila wan ban ai jingkyrshan ïala u jong u kyrtong da kaba khmih lynti ba un jop donburom ha kane ka Election, kumba long ki don haduh lai ngut ki kyrtong ki ban ïakhun na katei ka Constituency kiba kynthup na ka NPP, UDP bad VPP.
U ma Sniawbhalang Dhar haba ai jingkren ula pynsngew kum u MLA uba la jop ha manla ki jingïakhun na kane ka thaiñ, ula pyrshang ban pynïoh jingïarap katba lah ka bor hapoh kane ka shnong naduh ki jingdonkam ha ki Balang, ki skul bad ki surok hapoh jong ka shnong.
U kyntu ïa ki nongshong shnong ba kin shim ïa kane ka lad ban pynjop donburom ïa u ma Pheinshwa Nangleiñ namar kane ka shnong kaba buh eh ka vote ka dei jong u kum u kyrtong MLA, u kyrmen skhem ba ki paidbah kin nym eh ïa u kyrtong ka NPP uba don ïa ka thong ban trei hok ïa ka shnong baroh kawei ha ryngkat bad u kum u MLA ka thaiñ.
