Shillong, Naitung 27: Ka khubor ba la ïoh na ki pulit la ïathuh ba u Bah Nathan Richmon Tariang u la phah ka jingujor ba ha ka 23 tarik mynta u bnai ha ka por 4.41 baje mynstep, ki runar bym lah ban ithuh ki la tuh ïa 11 tylli ki khiew syntiew orchid napoh ka compound jong u kaba ha Upper Mawprem, Shillong.
Ha kawei pat ka jingjia ki pulit ki la pyntip ba u Myrank Thangkhiew u la phah ka jingujor ba ha ka 23 tarik mynta u bnai, ki runar bym lah ban ithuh ki la tuh ïa 4 tylli ki common header (Water Distribution Points) ba shongdor kumba T. 30,000/- napoh Nongkseh Block-10, Upper Shillong.
Shuh shuh ki pulit ki la ïathuh ba ka kong D D Syiem ka la phah ka jingujor ba ki runar bym lah ban ithuh ki la prong hapoh ka main building jong ka St. Peter’s School, Shillong, ki la pynjulor ïa ka jingkhang ba shadien bad skylight, ki la pyndonkam ïabun ki kamra ban dih drok bad ki la tuh ruh ïa bun bylli ki tiar napoh ka school building.
Ha kawei pat ka jingjia ki pulit ki la ïathuh ba u Bah Shyem Warhen Pale u la phah ka jingujor ba ha ka 7 tarik mynta u bnai, ki runar bym lah ban ithuh ki la tuh ïa u Remote Radio Unit (RRU) napoh u tower ba ha Windi Sohphoh, Umpling Dongshaneng (EKH).
Shuh shuh ki pulit ki la pyntip ba kawei ka longkmie kaba la 41 snem ka rta ka la phah ka jingujor ba ha ka 19 tarik mynta u bnai, ha ka por kumba 8.30 baje mynmied, uwei uba la kynnoh da ka kyrteng Lowis Mukhim (50 yrs) u la leh beijot ïa ka hapoh ka shnong West Jaiñtia Hills. Kham hadien kane ka longkmie ba la ujor ka la shem ba ka pisa kumba T. 2,000/- ka la jah na ka pla jong ka.
