Shillong, Risaw, 14: Saw ngut ki snar nonglute ki la shah kem ryngkat bad kawei ka thuk thuk Royal Enfield ba shu tuh katba ki Pulit ki dang pynlong ïa ka jingtalasi kali ha ka shnong Mawryngkneng, East Khasi Hills district.
Ha ka jingtalasi kali, ki Pulit ki la pynieng ïa kawei ka thuk thuk kaba don ïa u registration number AS-01-FY-0871 (Royal Enfield) ha ka por 10:30 baje mynmiet, hynrei u nongñiah um shym la pynsangeh satia ïa ka thuk thuk bad phet bak ban lait na ka kti ki Pulit.
Ki Pulit ki la kthong bad ïa ka thuk thuk ki la lap ba la iehnoh da ki nonglute ha ka shnong Mookyndur, West Jaiñtia Hills.Ha ka jingkhynra, ki Pulit ki la ïohkem ïa ki saw ngut ki briew kiba la ithuh kyrteng kum u Kleston Gympad (32 snem), u Behelden Khyriem (20 snem) bad arngut ki khynnah kiba dang hapoh 18 snem ka rta.
“Baroh ki dei kiba shong basah ha ka shnong Amlari Model, West Jaiñtia Hills bad ki dei ruh kiba shimti ïa ki thuk thuk tuh ki la shah kem,” la ong u SP ka East Khasi Hills Bah Vivek Syiem ha u kyrwoh ba la phah ha ka sngi Baar.
U la ong ruh ba ka kawei ka kali Alto Tourist kaba don ïa u registration number ML-04-D-4797 bad kawei ka thuk tuk Royal Enfield la kurup noh da ki Pulit.
Ha ka jingtohkit ki Pulit ki la lap ba ka thuk thuk ka dei kaba la shah rong tuh na Guwahati Pan Bazar.Ki Pulit ka nongbah Guwahati kin sa wan shimti ïa ki nonglute ban pynlong ïa ka jingtohkit,” la pyntip u SP.
