Jowai, Nailur 27: Ka jingïakhun Quarter Final haka kyrdan ‘Joybell Suiam Memorial Second Division Football League bala pynïaid da ka Thadlaskeiñ Sports Association (TSA) West Jaiñtia Hills kaba la long ha ka sngi Saitjaiñ, 27 tarik u Nailur, 2025, ha Wahiajer Multi-Sports Complex.
Haba phai sha ka jingïakhun Quarter Final kaba nyngkong la sakhi ïa ka Bamkamar kaba la pynliem noh da 3-2 kol ïa ka Nongdhar.
U Meshanmi Nongrum u la long u namtam na ka bynta ka Bamkamar ha kane ka jingïakhun da kaba thep marwei ïa baroh lai tylli ki kol (16, 22 & 63). Ïa ki ar kol na ka Nongdhar la thep da u Hayobiang Dkhar (24 & 35).
Ha ka jingïakhun ba ar ka Laru kala jop ïaka Myngkrem da ka jingïashut penalty da 4-3, hadien ka jingïakhaid kaba mar shikol (1-1) ha ka jingïalehkai.
Ha ka jingïalehkai dei ka Mynkrem kaba la thep nyngkong lyngba u Yomitre Khynriam (2’) hynrei ka Laru ka la pynïakhaid noh lyngba u Bahnah Suting (36’) shuwa ban jop ïa ka jingïakhun ha ka tie breaker.
La pyntip ka jingïakhun haka 29/09/2025 kaba dei ka Semi Final Eliminator ba lai jong ka kyrdan Super Division haka por 2 baje shiteng kan long hapdeng ka Lumphyrnai Sohphoh pyrshah ïaka Nongkhroh Rim.
