Jowai, Risaw 11: Ka Tyrshang SC bad ka Dongmihsngi SC ki la jop ïala ki jong ki jingïakhun jong ka lympung ‘Hajan Shylla Memorial Trophy First Division 2025’ bala pynïaid daka Thadlaskeiñ Sports Association (TSA) West Jaiñtia Hills, kiba la long ha ka sngi Saitjaiñ, 11 tarik u Risaw, ha madan Wahiajer Multi-Sports Complex.
Ka Tyrshang SC kala pynliem noh da 2-0 kol ïaka Lumsharatoh SC ha ka jingïalehkai kaba nyngkong. Kine ki ar kol jong ka Tyrshang SC la thep da u Heipor Shylla haka minit ba 29 bad u Barnabas Pyngrope haka minit ba 71.
Haka jingïakhun kaba bud la ïohi ïa ka Dongmihsngi SC kaba la wanphai nadien ban jop da 3-1 kol ïaka Maia SC.
Dei ka Maia SC kaba la pynkhihjar nyngkong lyngba u Dahi Lamare (6’) hynrei ka Dongmihsngi ka la pynïakhaid lyngba u Teimiki Nongrum (20’) shuwa ba u Stevenson Phawa (30’) bad u Baiamon Suting (79’) kin bynrap sa ar tylli ki kol ban pyndep ïa ka jingwanphai bad ruh ban khur ïa ka jingjop.
Ki jingïalehkai jong ka TSA 1st Division ha kane ka sngi nyngkong, 13 tarik Risaw, kan sdang haka haka por 12 shiteng mynsngi ha kaba ka Khliehtyrshi kan ïakhun pyrshah ïaka Modymmai. Katba haka por 2 shiteng nohphai sngi ka The A Team pyrshah ïa ka Larnai SC.
