Treilang kum kawei ka kynhun na bynta ka elekshon GHADC, kyntu u National President NPP

Shillong, K’Lyngkot 10 : U National President ka National People’s Party (NPP), ba dei ruh u Myntri Rangbah ka Jylla, Conrad K Sangma u la ong ba ka party ka la pynkhreh shaid shaid na ka bynta ka elekshon MDC ha Garo Hills Autonomous District Council (GHADC) bad kumta u la kyntu ïa ki nongïalam ka party ba kin trei lang kum ka kawei ryngkat ryngkat bad ki padibah nongkyrshan na ka bynta ka jingkiew ka roi ka pa ha ka jylla baroh kawei.
Haba kren ha ka jingïalang jong ka party ha Betasing ha South West Garo Hills, ha kaba la ïashim bynta da ki nongïalam ba rangbah jong ka party, ki MLA bad Myntri Sorkar u Marcuise Marak, u National President u la kyntu ïa ki nongtrei ka party ban shaniah skhem ha ki nongïalam jong ka party haba ïadei bad kane ka jingpynkhreh.
“Haba ki briew ki ai ïa ka jingjop, kam dei na ka bynta ka jingmyntoi shimet, kane kam dei ka bor jong ngi, kane ka dei ka jingkitkhlieh jong ngi”, la ong u Conrad.
“Kum ka party ba ïalam ïa ka jingsynshar ha ka jylla ngi dei ban kylli ïalade man la ka sngi kaei ka jingpher kaba ngi wanrah ha ka jingim jong ki paidbah jong ngi, ngim dei ban pynlehnohei wat tang kawei ka sngi bad ngi dei ban trei da ka mynsiem na ka bynta ki paidbah kiba la pynkhamti ha ngi ïa kane ka jingkitkhlieh,” u la ong.
“Ka GHADC ka dei ka tnad treikam kaba laitluid bad ka Sorkar Jylla kam lah ban tuklar beit beit ha ki kam jong ka,” u la pynshai.
Une u nongïalam rangbah jong ka NPP u la pynpaw ruh ïa ka jingpyrshang jong ka sorkar ban pynbeit ïa ka rukom siew tulop ïa ki nonghikai Adhoc, ka mat kaba la sah khlem lah ban pynbeit da ki phew snem. “Ym don ka sorkar barim kaba la pyrshang ïa kane namar ba ka dei ka rai treikam kaba eh bha. Hynrei ngi la shim khia bha ïa kane”, la ong u Sangma.