Treilang ka A Plus Charge bad ka Ather Energy ban pynbun jaka ai bording ïa ki kali elektrik

Shillong/Guwahati, Naitung 26 :Ha ka jingpyrshang ban wanrah ïa ka sawdong sawkun kaba khuid bad kaba kham paka ha ka thain shatei lam-mihngi jong ka Ri, ka A plus Charge ka la pynbna ba kan ïa trei lang bad ka Ather Energy, ka kompeni ba pawnam ba shna ïa ki arshaka ba ïaid da ka bording elektrik.
Kane ka jingïatrei lang ka thmu ban pynïar shuh shuh ïa ka jingdon ki jaka charge ïa ki kali elektrik ha kylleng ki bynta jongka thain shatei lam mihngi jong ka ri.
Lyngba kane ka jingïatrei lang, ka Ather Energy kan buh ïa ki jaka ai bor ding elektrik ha ki thain Shatei Lam Mihngi ha ki bun ki jaka kiba kongsan bad ba donkam tam. Kawei pa kawei ka jaka kan don ruh bad ki tiar ki tar kiba biang ban pynstet bad pynbha ïa ka rukom aibor ding katkum ka juk kaba mynta.
Ha kane ka jingïasnoh treikam lang jong ka jingstad bad jingshemphang ka juk mynta jong ka Ather ha kaban aibor ding elektrik ïa ki kali bad ka jinglah jong ka A Plus Charge ban don ki jingshna bad ki jingtei kiba biang kat kum kane ka juk kaba mynta. Ïa ki jaka ban aibor ding yn pynkhlain da ka A Plus Charge, ban pynthikna ruh ba baroh kiba pyndonkam kin ym shem kano kano ka jingeh bad ruh kan ym shim por bad nalor kine baroh kin ïoh mad ka jingsngewtynnad ban pyndonkam ïa kine ki tiar ka juk mynta.
Kane ka jingïatreilang ka thmu ban pynkhlain ïa ki jaka bad ïa ki iing bad ki dukan ba don ki jaka ai bording ha ki thain Shatei Lam Mihngi. Kine ki jaka aibor ding kiba thymmai kin ïarap ïa ka jingdonkam jong baroh ki Kali kum jong ka LECCS (Light Electric Combined Charging System) bad ki compatible LEV (Light Electric Vehicle). Bad ïa kine ki iing bad ki dukan yn buh ha ki bun ki bynta jong ki nongbah ha kine ki thain bad ruh ha ki lynti kiba kongsan tam kiba pynïasnoh ïa kine ki nongbah baroh bad khamtam ha kito ki jaka ha kiba bun ki nongleit nongwan kaban long kum ka jingpynshlur ïa kiba bun ban pyndonkam da ki kali Elektrik ha kine ki thain ki jong ngi ruh kumjuh, ha kine ki por kiba mynta.
“Ngi la sngewkmen bad phuhmut phuhmat haduh katta katta ban ïa don kti lang bad ka Ather Energy, ka kompani kaba don ka juh ka jingthmu ïa ka jingïohi jngai ka jong ngi ha kaban pynneh – bad ka jingleit jingwan kaba stad. Kane ka jingïatreilang kan ym long tang ban pynstet ïa kaban pynshlur ia ki briew ban thied da ki kali elektrik ha ki thain Shatei Lam Mihngi, hynrei ha kajuh ka por ban pynkhlain ïa ka jingdon jong ka A Plus Charge ha kine ki thain bad ruh ban don ki jaka kiba biang pura kiba la tip kum ki Charge Point Operator (CPO),” la ong u Samyak Jain, Founder & Director jong ka A Plus Charge.
Ha kaba nyngkong kin pyrshang shwa ha ki jaka sor kum ha Guwahati, Dibrugarh, Shillong bad Siliguri. Hadien kata kin sa nang pynïar pat sa sha Jorhat, Dimapur, Agartala bad kiwei pat ki nongbah kiba kongsan ha ki thain Shatei Lam Mihngi jong ka ri India ha ki bnai kiban sa wan.
Ki jingtei ïa ki ieng bad ïa ki dukan kin sdang noh shen, da kaba sdang shwa ha kitto katne ki jaka ba la ong haneng. Kane ka jingïatrei paralok lang ka la dei ka sien jam kaba kongsan tam eh ïa ka jingroi ka jingpar kaba skhem, kaba kynthup lang ïa baroh, bad kaba la long kloi ïa ka lawei kaban pynshlur ha kaban pyndonkam ïa ki kali Elektrik ha ki jaka kiba kongsan bad kiba donkam bha ha ri India bad ha kajuh ka por ki jaka kiba haduh mynta kim pat ïoh kum kane ka lad.