Shillong, Naiwieng, 25: Ka jingkhot pynlong jong ki san tylli ki kynhun sengbhalang da ka Non Cooperation Movement (NCM) ha baroh kawei ka jylla kum ka dak ban pynpaw ïa ka jingsngewsih halor ka jingshah siat ïap jong ki san ngut ki nongshong shnong jong ka shnong Mukroh, West Jaiñtia Hills District ha ki Pulit Assam kaba la jia ha ka step jong ka 22 tarik u Naiwieng, 2022, ka la sakhi ïa ka jingduna haduh katta katta ki nongtrei sorkar kiba leit trei la ka long ha Main Secretariat, ha Additional Secretariat bad ha kiwei kiwei de ki ophis treikam jong ka Sorkar Jylla kiba don ha dohnud jong ka sor Shillong.
Ha ki district bapher bapher ka rilum Khasi bad Jaiñtia la sakhi ba ki dkhot jong ki sengbhalang ki la leit beh lut ïa ki nongtrei na ki ophis treikam bad phah khang tala ïa ki shlem treikam. Wat ki Bank ruh ki la hap ban khang khyrdep na ka daw ka jingsheptieng ïoh ki mih kino kino ki jingjia kiba sngewsih kiba lah ban jia ha ka khyllipmat ka bym poi pyrkhat.
U Mawphor ha ka jingleit swait ïa ki ophis treikam jong ki tnat treikam bapher bapher kiba don ha ka thaiñ Lachaumiere bad ha IGP Point, la shem ba ki nongtrei Sorkar ki duna bha haduh katta katta.
Ka jinglong jingman ha nongbah Shillong na ki jingjia kiba ktah ïa ka shong suk shongsaiñ bad ïa ka leit ka wan jong ki paidbah naduh ka janmiet 22 tarik mynta u bnai ka la pynsuhjer haduh katta katta ïa ki paidbah na ka jingdon jong ki riewshim kabu ban pynthud ïa ka shongsuk shongsaiñ.
Ka jingthud jong ka shongsuk shongsaiñ ha nongbah Shillong ka la bthei kynsan naduh ka janmiet 22 tarik mynta u bnai hadien ba ki Pulit jong ka Jylla Assam ki la siat ïap ïa ki san ngut ki nongshong shnong jong ka shnong Mukroh, West Jaiñtia Hills District.
Ka jingpynbna jong ki san tylli ki kynhun sengbhalang da ka Non Cooperation Movement ha ka sngi Thohdieng la pynsuhjer ruh ïa ki nongshong dukan bad ïa ki nongdie madan ha shilynter ka surok GS Road.
Ha ka jingïaid swait, la shem ba ki dukan jong ki bar jylla ha Police Bazar, Khyndai Lad bad ha GS Road ki la khang khyrdep katba ha ka thaiñ Motphran, ha Iewduh, ha Garikhana bad ha Iewmawlong ka die ka thied ka thnem bha da ki nongthied nongpet bad ki nongleit nongwan.
