Treikam ka NCM ha SWKH: Na ophis treikam leit beh ka KSU bad FKJGP ïa ki nongtrei Sorkar

Mawkyrwat, ‘Naiwieng 25: Hadien ka jingpynbna da ka Non Co-operative Movement (NCM), ki ar tylli ki sengbhalang ba kynthup ïa ka Federation of Khasi Jaiñtia & Garo People’s (FKJGP) Mawkyrwat Circle bad ka Khasi Students’ Union (KSU) jong ka Mawkyrwat Circle mynta ka sngi ki la pynlong ïa ka jingpakhang ïa ki ophis treikam jong ki sorkar ryngkat ka jingkyrpad ïa ki ba kin ïa snohkti lang.
Ka jingthmu jong ki sengbhalang ban pakhang ïa ki ophis treikam ka long kum ka dak jong ka jingsngewlem ïa ki 5 ngut ki mynsiem ba kordor kiba la duh ei ïa la ka jingim ha ka jingjia ha shnong Mukroh, West Jaiñtia Hills kaba mar khap bad ka Assam.
U bah Pauldeep Tongwah, President ka KSU Mawkyrwat Circle haba kren ha ki lad pathai khubor u la pynpaw ka jingaikhublei na ka bynta ki paidbah jong ka dong ka thaiñ khamtam ki nongtrei ha ki ophis sorkar kiba la ai ka jingïatreilang ha ka jingkyrpad jong ki sengbhalang ban sangeh shipor ïa ki jingtreikam ha kane ka sngi ba mynta kaba long kum ka dak jong ka jingïasnohkti bad ban sngewlem ïa ka jingshah pynïap klep jong ki 5 ngut ki mynsiem ba kordor ha ka jingjia ha shnong Mukroh, East Jaiñtia Hills District ka shnong kaba markhap bad ka Jylla Assam.
Ha kajuh ka por u la buh ruh ka jingkyrpad ïa ki paidbah jong ka dong ka thaiñ ba kin long kiba ïai shah ha kum kane ka por namar lada ka sorkar kam pat lah ban leh ei ei mardor halor kato ka jingjia na ka liang jong ki seng hi kin dang hap ban pynjur ïa ki jingïakhih bad katba ka por kam lah ban batai ïa kata yn nym lah ban ong.
Katba ha ka jingkren jong u bah Enbor Syiem, Working President ka FKJGP Mawkyrwat Circle pat u la khot bad wer ïa ki paidbah nongshong shnong ba kin wan ban ïashimbynta lang ha ka jingthang mombati kum ka dak ban sngewlem ïa ki 5 ngut ki mynsiem kiba kordor kiba la duh ei ïa la ka jong ka jingim ha ka kti jong ki pulit ka Assam ha kine ki khyndiat sngi.
Ïa ka jingthang mombati yn pynlong ha ka por 4:30 janmiet jong ka 26 tarik mynta u bnai ha kaba na ka liang ka KSU Mawkyrwat Circle bad ka FKJGP Mawkyrwat Circle kin sa shim ïa ka bynta ban ïalam.