Nongstoiñ, Nailur 12: Ka District Magistrate, Eastern West Khasi Hills District, Mairang ka la pynjari ïa ka kyndon Aiñ 163 BNSS, 2023 ban khang pyrshah ïa kino kino ki riew shimet ne ki kynhun ban lum thup ïa u shyiap, maw ne kino kino ki tiar kiba ju pyndonkam ha kaba shna ïing ha ki rud jong u surok Kynshi-Myrïaw khlem da ïoh jingbit.
La pynjari ïa kane ka hukum hadien ka jingïoh jingtip ba ki don katto katne kiba ju lum thup ïa u shyiap ha ki rud jong u surok Kynshi-Myrïaw, kaba la wanrah ïa ka jingjot jong u surok, ka pynblok ïa ki nala um, ka pynthut ïa ka jingïaid beit jong ki kali bad ki nongleit nongwan.
Lada lap ïa kino kino ki riew shimet, ne ki kynhun kiba ïaleh pyrshah bad pynkheiñ ïa kane ka hukum, kin shah pynshitom katkum ki kyndon aiñ. Kane ka aiñ kan treikam mardor tad haduh ban da pynbna da kumwei pat.
