Trei shitom, trei hok ïa ka kam khnang ban dup urlong ki jingthmu : Bah G. Lyngdoh

Mawkyrwat, ‘Naitung, 08: Ki 50 ngut ki samla na kylleng ki shnong hapoh ka South West Khasi Hills District bad nabar jong ka distrik ki la pyndep ïa ka jingshah hikai ha ka Electronics bad ka Electrical Appliances Repairing ba la pynlong da ka GCIITs Society, South West Khasi Hills District ha GCIITs Training Centre ha Mawkyrwat.

Lah ban kdew ba ïa kane ka 4rd Batch la plie ha ka 20 tarik, Jylliew, 2025 da u Consultant ka RAMP u Akshat Joshi.

Ka jinghikai na ka bynta ki 50 ngut ki samla ka dei hapoh ka jong ka Raising & Accelerating MSME Performance (RAMP) ba la bei tyngka da ka World Bank ba la kyrshan ruh da ka Commerce & Industries jong ka Sorkar Meghalaya ha kaba ka GCIITs’ Training Centre, Mawkyrwat ka shim ïa ki samla ki ban sshah pyntbit ha ka Electronic Appliance Repairing ki don 25 ngut ki bad ha ka Electrical Appliance Repairing ruh ki don 25 ngut bad ka jingai jinghikai ka long tang hapoh 15 sngi.

Ïa ka Gracy & Co. Institute of Information Technology ne ka GCIIT Society, Mawkyrwat la sdang naduh 11 tarik, Kyllalyngkot, 2011 da ka jingthmu ban kyntiew lem ïa ki samla jong ka thaiñ ha ki kam pyntbit ha ki kam Computer.

U Assistant General Manager ka District Commerce & Industries Centres (DCIC), South West Khasi Hills District Bah G. Lyngdoh uba la long kum u kongsan ha ka jingkren u la ai mynsiem na ka bynta ki samla kiba la pyndep ïa kane ka jingshah hikai ha ki ar bynta ba kin pyndonkam hok, ym ban shu pynleh nohei.

“Haoid ka dei tang 15 hynrei ïa kaei kaba phi la ïoh jinghikai pyndonkam hok ïa ka khnang ba ka jingwan jong ki ha kane ka shlem shah hikai kan nym lehnohei,” u la ong.

Ha kane ka sngi kiba la ïadonlang ki long u bah A. Nongpyiur, Inspector of Taxes State GST bad na u bah H. Kharlyngdoh, Superintendent of Taxes State GST, u bah V.W. Nongsiej uba dei u Executive Director jong ka GCIITs Society kiwei de kiba la shah khot sngewbha ryngkat ki nongwan shah hikai.