Shillong, Nohprah 06: “Ka Civil Defence bad Home Guard jong ka sorkar jylla ha kine ki snem ba la leitnoh ka la lah ban ai ka jingshakri kaba ratbah ïa ki nongshong shnong jong ka jylla Meghalaya bad ïa ka imlang sahlang,” ong u Bah Comingone Ymbon, Myntri jong ka tnat Civil Defence bad Home Guard.
Ïa kane u la ong ha ka sngi rakhe ïa ka sngi ba 62 snem jong ka sngi seng ïa ka Civil Defence and Home Guards kaba la long ha CTI Parade Ground, ha Mawdiangdiang, Shillong.
Haba kren ha kane ka sngi hadien ba la dep ban pynlong ïa ka parade bad ka jingsam ïa ki medal, na ka liang u Myntri u la ong ba kine ki artylli ki seng bad shnat sorkar ki la ai ka jingshakri kaba bha tam ïa ka jylla bad kumjuh ruh ïa ka imlang sahlang khamtam ha ki por kiba kyrkieh.
U Bah Ymbon u la ïaroh ruh ïa kane ka tnat ba ka la ai ki jinghikai ha kaba ïadei bad ka Disaster Management, Search and Rescue bad Medical First Aid sha ki 9614 ngut ki nongshong shnong bad ki samla pule kiba sah ha sor bad nongkyndong, ba kynthup ruh ïa ki sengbhalang, School bad ki samla pule College bad kumjuh ruh ïa ki ophisar sorkar nalor kiwei pat.
U la bynrap ruh da kaba ong ba ha u snem 2023-2024, 160 ki nongtrei monsngewbha jong ka tnat Home Guards bad kumba 410 ngut ki Civil Defence volunteer ki la ai ki jinghikai bad kumba 1977 ngut ki trained Home Guards volunteers ki la shim bynta ha kiba bun ki tnat treikam jong ka sorkar ne ki PSU bad private agency ha kaba kane ka la ïarap ïa ki ba kin ïoh kamai da kaba ïarap ïa ki ban ai ki jingïada ha kiba bun ki liang.
U Myntri u la pyntip ruh ha ka jingïalang ba ka tnat ka la dep ban ai ka jingtyrwa na ka bynta ban ïoh ka jingmang pisa kaba long T.4,15,87,060/- (Rupees four crore fifteen lakh eighty seven thousand sixty) na ka bynta ban tei ïa ka Flood Simulation Pool na ka bynta ban ïoh ki lad ai jinghikai haba ïadei bad ka jingpynlang ïa ka um na ka bynta ki nongtrei ka State Disaster Response Force (SDRF) bad kaba ba ar pat ka dei T..30,10,049/- (Rupees thirty lakh ten thousand forty nine) na ka bynta ban tei ïa ka 11 kv line bad 200 kv substation na ka bynta ban pynbiang ïa ka bording sha ka ophis Civil Defence and Home Guards ha Jowai.
Haba pynpaw ïa ka jingïaroh ïa ka sorkar jylla u Bah Ymbon u la ong ban ïarap pynduna ïa ka jingduna ki nongtrei hapoh ka tnat na ka liang ka sorkar ka la ai ka jingmynjur ban pynrung kam sa kumba 448 tylli ki kam kiba thylli kaba kynthup ïa ka kam Sub-Inspector-4, Guardsman-284, NCE- Top Floor-Horse Shoe Building, Lower Lachumiere, Shillong-793001, 140 tylli ki kam bad 17 ngut ki kam niah kali ha kaba ka tnat lyngba ka Transparent Recruitment Process (TRP) ka la sdang ia kane ka kam.
Kham ha shwa u Myntri u la sam ruh ïa ki President’s Home Guards and Civil Defence Medal halor ki jingithuh ïa ki kam ba la nohsynniang da ki nongtrei ba kynthup ïa u MK Sangma, Joint Director of Civil Defence, Meghalaya bad ïa ka Home Guards and Civil Defence Medal halor ki kam shakri sha u Inspector Bokstar Mynsong na ka Border Wing Home Guards Battalion.
U Myntri u la sam ruh ïa ka DG Fire Services, Home Guards and Civil Defence, MHA New Delhi Disc and Commendation certificate sha ki 5 ngut ki ophisar bad 9 tylli sha ki pulit jong ka tnat.
Katba u MK Singh, IPS, Commandant General of Civil Defence and Home Guards u la sam ïa ki syrnot jong ka Director General of Civil Defence and Home Guards Meghalaya Commendation sha ki 2 ngut ki ophisar bad ïa 13 ngut ki pulit jong ka tnat.
Ha kane ka jingrakhe ïa ka jingdap kaba 62 jong kane ka tnat la pynlong ruh ïa ka parade na ki 4 tylli ki kynhun ba kynthup ïa ka Border Wing Home Guards Battalion, Central Training Institute of Civil Defence and Home Guards, Brass Band na Border Wing Home Guards Battalion bad Pipe Band na, Central Training Institute of Civil Defence and Home Guards bad kiwei kiwei ki prokram.
