Tohkit ki Pulit ba buhrieh ki bor pynïaid ïa ka jingkem ding ka kamra ka Petrol Pump

Tura, Jymmang, 10: Ki Pulit jong ka West Garo Hills District ki la pynlong ka jingtohkit kaba bniah ban lap ïa ka daw tynrai halor ka jingkem ding kynsan jong kawei ka kamra ha Petrol Pump jong ka Indian Oil Corporation ba la tip ruh kum ka AOC, kaba don ha Hawakhana, Tura.
Katkum ka jingtip ba la ïohlum, ki bor pynïaid jong kane ka Petrol Pump kim shym la pyntip satia sha ki bor Pulit halor kane ka jingpluh jong ka kamra ha Petrol Pump kaba la jia ha ka 1 tarik mynta u bnai. Kane ka jingbym pyntip jong ki nongtrei sha ki bor pynïaid ka la buh jingma ym tang ïa ki nongïaid lynti hynrei wat ïa ki kali kiba ju wan theh petrol ha kane ka Petrol Pump bad ïa ki ing briew kiba don markhap.
Ki Pulit jong ka Tura Police Station ki la ïoh jingtip halor ka jingbuhrieh ïa kane ka jingjia na uwei na ki nongtrei bad na ki katto katne ki paidbah kiba la ïohi ïa ka jingkem ding jong kane ka kamra ha kane ka sngi.
Ha ka miet lah sngi U Blei, ka kynhun ki Pulit ki la hiar sha kane ka Petrol Pump ban pynlong ïa ka jingtohkit na ki nongtrei shaphang kane ka jingjia. Nalor kata, ki Pulit ki la kurup ïa ka CCTV ba la ïoh ringdur halor kane ka jingjia bad mynta ki dang pynlong ïa ka jingtohkit kaba bniah halor ka jingkynnoh ba ki nongpynïaid ki la pyrshang ban buhrieh ïa kane ka jingjia kaba buh jingma ïa ka jingim jong ki briew.
“Ngi la ïoh jingtip ba ka don ka jingkem ding ha kawei na ki kamra ha ka 1 tarik, Jymmang hynrei ym shym la pyntip satia sha ngi. Ngi la tohkit lut ïa baroh ki nongtrei bad ngi la kurup ruh ïa ka Digital Video Recorder,” la ïathuh u Superintendent of Police jong ka West Garo Hills u V S Rathore.
U la ong ba ka tnat Fire and emergency Services ha Tura kan sa pynlong ïa ka jingtohkit kaba bniah halor kane ka jingjia bad ban lap ïa ka daw tynrai halor ka jingkem ding. U la ong ruh ba kane ka kynhun tohkit kan sa shim ïa ki lad ki lynti ban buh ïa ki jingïada ha kane ka Petrol Pump lada donkam.
“Lada ngi lap ba ka don ka jingleh torti ngin sa shim da ki sienjam ba tyngeh katkum ka aiñ namarba kane ka buh jingma ïa ka jingim jong ki briew,” la maham u Rathore.
Ka jingpoi jong ki Pulit ha Police Station ban tohkit halor kane ka jingjia na ki nongtrei, bun na ki paidbah ki bym tip eiei shaphang kaba la jia ki la kmen haduh katta katta da kaba shu ïalap khana ba ki bor pynïaid jong kane ka Petrol Pump ki la ngat ha jingshah tohkit halor ka jingbam sap bad halor ka jingleh torti ka rukom treikam.