Shillong, Nailur, 17: Uwei u Pulit ïa uba la tip kyrteng kum u Bah Lamphrang Lyngkhoi u la ïap ha ka jaka sah ha ka ktem jong ka 1st MLP Battalion, Mawiong, Shillong.
La ïoh jingtip ba une u Pulit u dei na ka Batch 2008 jong ka 1st MLP Batallion.
Hadien ka jingjia, u nonglum khubor u la ïohlad ban ïakren bad u para jong u Bah Lamphrang ïa uba la tip kyrteng kum u Bah Tomlin Lyngkhoi.
U Bah Tomlin u la ïathuh ba u Bah Lamphrang u la ïap ha ka miet sngi Saitjaiñ ha ka jaka sah jong u hynrei haduh mynta kim pat lah ban tip ïa ka daw halor ka jingïap bad u la ong ba ki bahaiing hasem ki dang ap ïa ka kaiphod post mortem bad na ka jingtohkit jong ki Pulit.
U Bah Tomlin u la ïathuh hadien ba la pyndep ïa ka post-mortem la tep noh ïa u Bah Lamphrang ha ka 16 tarik mynta u bnai bad u la ïathuh ba u Bah Lamphrang u dei u khun nyngkong na ki lai ngut ki shipara bad ki dei na ka shnong Liarkhla, ka shnong kaba don shakhmat jong ka Bhoirymbong, Ri-bhoi District.
Haba pyrshang ban kylli bniah na u Assistant Inspector General of Police (AIGP) Bah Vivek Syiem, u la phah jubab lyngba ka WhatsApp da kaba ong ba ka jingtohkit ka dang ïaid shakhmat.
Kane ka jingïap jong u Bah Lamphrang Lyngkhoi kaba la saphriang ruh ha ka synran Social Media kaba la pynmih ïa kiba bun ki jingkylli.
