Tlot ka jingkamai ron baroh liang, jop ei ka Tura DCA ïa ka North Garo Hills ha ka MCA U-16 Inter District
Shillong, Ïaiong 22 : Ka kynhun ïalehkai jong ka Tura District Cricket Association ka la ïoh ban khur ïa ka nam jop ha ka jingïakhun sdang jong ka Zone 2 jong ka MCA U-16 Boys Inter-District Tournament 2025 kaba long ha Mendipathar ha kane ka sngi Ba-ar.
Ka Tura ka la ïoh ban pynliem noh da san wiket ïa ka kynhun trai jaka, ka North Garo Hills DCA ha ka jingïakhun kaba duna bha ka jinglah kamai ron.
Haba phai sha ka jingïakhun, ka Tura hadien ba ka la jop ïa ka jingkynting pisa ka la jied ban kawang bol nyngkong. Kane ka kynhun ka la lah ban pynkhyllem lut ïa ki rangtied jong ka liang pyrshah ha ka por ba ki dang ïoh kamai tang 39 ron ha ki 18.1 over. Na ki rangtied dei tang u Chingjring K Marak uba la ïoh ban kamai ron bun eh kata ruh tang 12 ron.
Haba phai sha ki nongkawang bol pat u Aniket Poddar u la ïoh ban khur saw wiket ha 7 over, katba u Doangkam Ch Marak bad u Ishan Saha ki la ïoh ban khur mar lai wiket.
Kane ka rukom kamai ron ka la jia ruh kumjuh ïa ka Tura kaba la shem jingeh ban beh ïa ka thong khamtam haba ym don uwei ruh u nongtied uba lah ban kamai palat ïa ka 7 ron. Hynrei ka jingdon haduh 17 tylli ki wide na ka North Garo Hills ka la ïarap ïa ki ban poi haduh 40 ron la san wiket ha ki 16.4 over ban jop ïa ka jingïalehkai ha kane ka sngi.
Ha ka lïang ki nongkawang bol pat, u Chingjring u la ïoh ban khur lai wiket ha ki 2.4 over hynrei ïa ka khusnam rangïalehkai ba kynsai ha kane ka sngi la ïoh ban khur da u Aniket jong ka Tura.
Ha ka jingïakhun ha ka Zone 1 kaba la sang ha Mukhla Mission, West Jaintia Hills ha ka 15tarik Ïaiong, ka Group A ka kynthup ïa ka Shillong Cricket Association A (SCA-A), SCA-B, East Jaintia Hills DCA, South West Khasi Hills DCA bad ka West Khasi Hills DCA.
Katba ha ka Group B pat ka kynthup ïa ka Ri-Bhoi DCA, East Khasi Hills CA, Eastern West Khasi Hills DCA bad ka West Jaintia Hills DCA.
Ha ka Zone 2 pat la kynthup beit tang ha kawei ka thup jong ki saw tylli ki kynhun kata ka East Garo Hills DCA, North Garo Hills DCA, South Garo Hills DCA bad ka Tura District Cricket Association.