Tih khyndew na Meghalaya tuid ka khyndew bad shlei um sha Assam

Nongpoh, Jylliew 01: Kumba la sakhi ha kine ki khyndiat sngi hadien ka jingther u lapbah la ïohi ba ka jingshlei ka la ktah shisha ïa ki katto katne ki shnong ba hap ha Meghalaya bad Assam bad lah ruh ban kynnoh ba ka dei na ka jingtih khyndew na ki lum ba don ha Meghalaya ha kaba tang shu slap ka um ka la rong ïa ki khyndew, ki shyiap bad ki jaboh bad sa poi sha u pud jong ka jingshlei um ha kiba bun ki shnong khappud ka Assam bad Meghalaya ruh kumjuh.
Lah ruh ban kdew hangne, ba halor ki jingjia shlei um ha Sorbah Guwahati lem bad ha kiwei ki shnong ba don ha khappud ka Meghalaya bad Assam, dang ha kine ki khyndiat Taiew ba u Myntri Rangbah ka jylla Assam, u Himanta Biswas Sarma, u la kynnoh ba katei ka jingjia shlei um ka dei tang na ka daw jong ka jingdon bun ki jaka ba la tih khyndew beaiñ ha ki lum ka Meghalaya.
Ha ka jinglum jingtip da u Nongthohkhubor, la lap ba katei ka jingkynnoh u Himanta Biswas Sarma, lehse ka lah ban dei ka jingshisha, namar haba peit ïa ka jingjia shlei um ha ki shnong khappud kata naduh ki thaiñ Pillangkata sha Maikhuli ter ter shaduh Khanapara, Baridua, Jorabat bad shaduh Umpher 12mer, ha kaba kane ka jingshlei um kam dei ba ka ktah tang ïa ki shnong kiba hap ha Assam, hynrei kane ka jingshlei um ka ktah ruh wat ïaki shnong kiba hap ha u pud u sam ka Meghalaya.
Na kaei kaba la lap, ba tang na ka jingtih khyndew kaba don ha ka liang jong ka Meghalaya kata ha Jorabat, ha kaba ka jingtih khyndew ha katei jaka ka la wanrah jingeh ïa ki paidbah, namar katei ka khyndew ka la tuid sha surok ha ki por ba hap slap bad kaba la pynlong ïa ka surok ba kan dap da ka ktieh bad ki ahor ha ryngkat bad ka umktieh kaba tuid sha ki surok jong ka Jorabat.
La ïohi ruh ba tang na ka khyndew ktieh kaba tuid na Meghalaya sha Assam ha ki bynta ka Jorabat, la ïohi ba ki bor sorkar ka Assam, ki la shim khia bad trei shitom ban pynkhuid ïa ka ktieh kaba la tuid na ki kam tih khyndew na Meghalaya, ha kaba da ki phew trok ka khyndew ktieh ki la hap ban pynkhuid na ka daw ka jingtih khyndew na ki Lum ka Meghalaya.
Haba phai pat sha kawei ka liang, shi rukom la dei ban ai jingïaroh ïa ki nongïalam ka FKJGP Byrnihat Circle, ha kaba hynnin ka sngi, ki la leit ban khang syndon ïa kawei na ki jaka tih khyndew kaba don ha Jorabat bad katei ka jaka tih khyndew ka la dei kawei na kiba pyntuid ktieh sha surokbah NH-6 bad kaba la wanrah jingeh ïa ki paidbah ha ka leit ka wan.