Shillong, Naitung, 27: U MDC jong ka Tura Constituency u Bernard N. Marak uba la shah kem ha ki Pulit jong ka Jylla Uttar Pradesh na Hapur District ha ka sngi Baar, ki la tian bishar ïa u ha ka Kashari jong ka Jylla Uttar Pradesh.
Kum ban shu pynkynmaw hangne ba ka jingthwet jong ki Pulit ïa u Bernard haduh ban da ïoh kem ka long hadien ba ki Pulit jong ka West Garo Hills District bad u Depuy Commissioner jong ka West Garo Hills ki la pynlong ka jingkhynra ïa ka Rimpu Bari Resort kaba don ha Edenbari ha ka janmiet sngi Thohdieng ha kaba 73 ngut ki briew ki la shah kem bad ïoh pyllait im ruh san ngut ki khynnah rit. Na kane ka jaka ki Pulit ki la ïoh kurup bun bha ka kyiad bad kynthup ruh ïa ki jri sop ki bym pat pyndonkam.
U Bernard uba dei ruh u Vice President jong ka BJP Meghalaya State Unit u la shah kem hadien ba ki Pulit jong ka Jylla ki la pynmih da ka Lookout Notice bad mynta ki Pulit ka West Garo Hills ki dang ap ïa ka hukum na ka Kashari ban shimti ïa u Marak bad ban wanrah ïa u sha Tura.
Ka jingkhynra ïa kane ka Farm House jong u Bernard ïa kaba la kynnoh ba la pynlong ruh kum ktem awria ba beaiñ ka long hadien ba ki Pulit jong ka West Garo Hills ki la pynlong ïa ka jingtohkit kaba bniah hadien ka jingshah leh be-ijot jong kawei ka khynnah hapoh kane ka iing basa ha ka 28 tarik, Rymphang.
Ha kaba ïadei bad kane ka jingjia, u Deputy Commissioner jong ka West Garo Hills u Swapnil Tembe ha ka sngi Balang u la thung da ka Magisterial Inquiry ka ban sa khlieh da ka Executive Magistrate ka Rezia Ch. Sangma ban tohkit halor ka jingpynïaid jong u Bernard ïa ka Farm House bad la bthah ruh ban aiti ïa ka kaiphod hapoh 15 sngi.
Ka jingtohkit kan long la u Bernard u dei neem u trai jong kane ka Farm House, la u la ïoh jingbit neem na ki bor ba dei peit ban pynlong ïa kane ka Farm House kum ka Hotel, la u la ïoh jingbit neem ban tan umbam umdih bad hato u siew neem ïa ka bai thang bording bad la u la ïoh neem ïa ka laisen ban die kyiad bad ban die jingbam ha kane ka Farm House. Ka jingtohkit kan long ruh la u Bernard u la ïoh jingbit neem ban pynlong ïa kino kino ki khawai dawai ha kane ka iing basa.
Ka jingtohkit kan long ruh, la u Bernard u la ïoh bor neem na ki bor ba dei peit ban ri ïa kine ki khynnah ha kane ka Farm House namarba la kynnoh ba ïa kine ki khynnah la shu pyntrei bordi.
