Thwet lut ïa ki mynder bad pynher krad ïa ki na ka thaiñ, dawa ka NESO na ka Sorkar Pdeng

Shillong, Naiwieng 19 : Ka North East Students’ Organisation (NESO) ka la dawa na ka Sorkar Pdeng ba ka dei ban thwet bad lada lap dei ban beh noh mardor ïa baroh ki mynder kiba wan buhai shnong beain bad ruh ba dei ban khang lut sbak baroh shi lynter ka khappud jong ka India bad Bangladesh bad ruh ban pyntreikam noh mardor ïa ka Inner Line Permit ha baroh ka thain shatei lam-mihngi baroh kawei.
Kine ki dei shi bynta jong ki 11 tylli ki mat jingdawa ba ka NESO ka phah sha ka sorkar pdeng lyngba u Lat ka Jylla u CH Vijayashankar ha kane ka sngi Ba-ar.
” Ngi la kytnu ruh ia ka sorkar pdeng ban pynkhlain ïa ka jingpyrkhing bad jingpeitngor ia ki khappud, baroh ar khamtam ha ki jaka ba don jingma, da kaba buh ïa ki bor pahara kiba biang bad ki kor peitngor ka juk ba mynta, ki jingpyllait pura na ka jingtreikam jong ka Citizenship (Amendment) Act 2019 bad Immigration and Foreigners (Exemption) Order, 2025 na ka thain shatei lam-mihngi baroh kawei, ” ong u Chairman ka NESO u Bah Samuel Jyrwa ha ka dorkhas.
Shuh shuh u la ong ruh ba ki dawa ban pyntreikam pura ïa ka soskular ïasoi jong ka Assam ne ka Assam Accord bad ruh ban ai ka jingïada ïa ki trai ri trai muluk jong ka Assam katkum ka jingai jingmut jong ka Justice Biplab Kumar Sarma Committee kaba la thaw da ka sorkar pdeng bad ruh ban ai ka jingïada kaba long katkum ka Riti Synshar ïa ki trai ri trai muluk jong ka Tripura.
Nangta la dawa ruh ban pynkhreh ia ka National Register of Citizens (NRC) na ka bynta baorh kawei ka thain shatei lam-mihngi jong ka ri da kaba kdew pat ïa u snem (Base Year) katkum ka jinglong tynrai jong kato ka jylla bad ruh ban bishar biang sa shisien ïa ka NRC jong ka Assam bad ruh ban pynïoh noh da ka Inner Line Permit ïa baroh kawei ka thain shatei lam-mihngi jong ka Ri.
Ka NESO ka la dawa ruh ba dei ban don ka jingïatrei lang bad ki jylla ba marjan ryngkat ki tnad ba dei peit ban pyntikna ba ki mynder lane ki nongwan buhai shnong kim dei tang ban shah pynkynriah jaka hapoh ka thain hynrei kane kan long ruh ban pynneh pynsah bad ïada ïa ka hok ki trai ri trai muluk, ka kolshor ka ktien, ka sain hima sima bad ka jinglong trai ïa ka khyndew ka shyiap lyngba ki lad jingïada katkumka ain ba kyrpang. La dawa ruh ba dei ban don da ka Special Review Committee ban peit halor ka jingkiew kynsan ka jingbun briew ha ki katto katne ki jaka.
“Ngi kyntu ïa ka Sorkar India ban leh ia kane ka mat da ka jingsngewkhia bad jingkyrkieh naba ka kam ka dawa. Ki jingkylla ha ka jingbun briew bad ka kolshor kiba la paw lypa ha ki bynta jong ka thain jong ngi ki long ki jingmaham. Lada ym shim ïa ki lad ki lynti kiba khlain bad kiba tyngeh ka jinglong trai ri trai muluk jong ka thain shatei lammihngi ka lah ban kylla lut,” u la bynrap shuh shuh.
Ka NESO ha ka dorkhas ka la kynthoh ruh ïa ki polisi jongka sorkar pdeng kiba dang shen, khamtam eh ïa ka Citizenship (Amendment) Act 2019 (ba la pyllait shi bynta ha ka thaiñ shatei lammihngi) bad ka Immigration and Foreigners (Exemption) Order 2025, da kaba ka ong ba ka pynsniew ïa ka jinglong jingman da kaba ailad ïa ki katto katne ki nongwan buhai shnong na Afghanistan, Bangladesh bad Pakistan ba kin ïai bteng ban don ha India.