Thwet, kem bad pynshitom da kaba tyngeh ïa ki runar kiba leh ïa ki kam pynshongsier

Mawkyrwat, Risaw 07: Hadien khatar sngi na ka jingshah thang dusmon ka kali jong u Acting Syiem ka Hima Nobosohphoh Syiemship, ki Rangbah Shnong, ki Seng Longkmie kiba hap hapoh jong ka Hima Nobosohphoh Syiemship ha ka sngi Baar ki la pynlong ka jingïalang paidbah ha ophis jong u Syiem Nobosohphoh Syiemship kaba ha shnong Rangblang South West Khasi Hills District.
Kane ka jingïalang ka long kum shibynta ban pynrem jur ïa ki runar kiba la thang dusmon ïa ka kali jong u Bah Ferdinand Syiemiong uba dei u Acting Syiem ka Hima Nobosohphoh Syiemship kaba la jia ha ka miet jong ka 25/09/2025 katba ka kali jong u ka dang ïeng harud surok ha shnong Rangblang South West Khasi Hills District.
Hadien kane ka jingjia, la ong ba da ka jingïatylli lang baroh bad da kawei ka sur ki la pynrem jur ïa ki runar kiba la leh ïa kane kam dusmon bad ym tang kata ki la kyntu ruh ïa ki bor ka aiñ lyngba u Superintendent of Police ba kin shim khia ban thwet mardor ïa ki runar bad dei ruh ban pynshitom da kaba tyngeh kum ïa kine ki briew kiba leh ïa ki kam kiba pynshongsier ïa ki nongïalam jong ka Hima Nobosohphoh khamtam ïa u Acting Syiem.
Kiba la ai jingkren ha kane ka sngi ki kynthup ïa ka kong Probina Thyrniang na ka Seng Longkmie, na u bah Bhabiang Sangriang uba dei u Assistant Secretary jong ka shnong Rangblang, bad na u bah Darlington Thongni uba dei u Lyngdoh Sanmad hapoh ka Hima Nobosohphoh Syiemship.