Shillong, Jymmang 26 : Ki Pulit ka East Khasi Hills, kila pynlong ïa ka jingthwet kaba jur ban lapdien ïa u riew runar uba donkti ban khyllie skad ïa kawei ka khynnah skul ba dang ïaid lynti ha ka thaiñ Umsohsun, Shillong.
“Ngi la register da ka suo moto case halor kane ka jingjia bad la pynngat hapoh ki kyndon jong ka Protection of Children from Sexual Offences (POCSO) Act” ong u Superintendent of Police ka District Bah Vivek Syiem.
Ki Pulit ki la shimkhia ïa kane ka case hadien ba ka video bala ïohring da ka kor CCTV, kala saphriang kylleng sawdong, kaba pyni ba une u riew runar bala kah durkhmat, ula khyllie skad jubor ïa kawei ka khynnah skul ha ryngkat bad ka ring video da ka mobile, ha Umsohsun. Kane ka jingjia kala jia ha ka step sngi Thohdieng.
Kat kum ka jingïathuh u SP “Ngi la buh ïa ka kynhun ka ban bishar bniah kyrpang ïa ki video ba ring da ki kor CCTV ba pyndait ha kane ka thaiñ. Sa kawei pat ka kynhun la buh ban ithuh bad kem ia une u briew ba donkti. Ki jingpyrshang baroh kila iaid shaid shaid halor kane ka kam”.
U Rangbah Shnong ka Umsohsun Bah Tribelget Dkhar, ula pynrem jur ïa kane ka jingjia ha ka kyrwoh bala pyllait ha ka sngi U Blei. Ula kyntu ruh ïa ki nongshongshnong ba kin peitngor bha bad ban pyntip ia kano kano ka jingishankhmat sha ki bor ka aiñ khlem da pynslem.
