Nongpoh, Nailur 08: Ka jingthud palat ka bording ilektrik ha Ri Bhoi bad kynthup ruh wat ha Nongpoh kaba dei ka Head Quarter ka District ka la ktah shisha ïa ki kam ki jam jong ki paidbah bad kane ka jingthud ka bording ka la pynbitar ruh ïa kiba bun ki paidbah ba bun ki kam ki jam ki la shah ktah tang na ka daw ka jingthud palat ka bording ilektrik.
Haba kren halor kane ka jingshah ktah na ka jingthud ka bording ilektrik ha Ri Bhoi, ka la don ruh ka jingïakren ba ha Nongpoh, kaba dei ka Head Quarter ka District la donkam ban don noh ka 132 KV Power Sub Station bad dei tang lada urlong kane 132 KV Power Sub Station ka Nongpoh kan lait ka jingthud palat ka bording ilektrik kaba la ktah shisha ïa ki paidbah ha baroh ki kam ba ha kane ka juk ba mynta khlem ka bording ilektrik kiba bun ki kam kin shu pulom ei.
Kumba la ioh lum jingtip, ha ka jingshisha ka la don ka jingthmu ban wan rah ïa kane ka 132 KV Power Sub Station ha Nongpoh ha kaba la wad ruh ïa ka jaka ban buh ïa kane ka 132 KV Power Sub Station bad la ioh jingtip ruh ba ka don ruh ka jingsahteng na ka daw ki kam jaka ba ka don ka jingpyrshah ban pynïaid ïa u Sainar jong ka 132 KV Power Sub Station.
Halor kane ka jingthud ka bording ilektrik bad kaba ym ju poi thikna katkum ka jingdonkam ki paidbah, la sakhi ruh ba ynnai ïa kren sha ki shnong Nongkyndong, hynrei wat ha Nongpoh kaba dei ka Head Quarter ka District, ki paidbah ki kynduh ïa kajuh ka jingeh kaba ktah na ka jingthud palat ka boding ilektrik.
Kumba la ioh lum jingtip ruh na ki paidbah, kane ka jingthud ka bording ka la shah ktah ha baroh ki shnoing ha Ri Bhoi bad la sakhi ruh ba ka bording ilektrik kam ju neh thikna bad tang shu slap khyndiat la thikna ka jinglip bording bad ka jingshah ktah pat ka dei ïa ki paidbah ha kaba bun ki kam ki jam ki la sahkut na ka daw ka jingbym don ka bording ilektrik.
Kane ka jingthud palat ka bording, ka dei kawei ruh na ka jingeh kaba ki paidbah ha Ri Bhoi ki ju ïa kynduh jingeh na ka por sha ka por bad ki la don ruh ki paidbah kiba khñium ba ïa ka bai bording ki hap ban siew thik thik bad ka bording pat kam ju poi thikna sha ki paidbah ba ha kane ka juk stad mynta khlem ka bording iletrik ka ktah jur ïa ki kam ki jam jong ki paidbah ha Ri Bhoi.
