Mawkyrwat, Naitung, 03: ka Jingbymbiang bad ka jingthud ki Company Network bapher bapher ha ka thaiñ Mawkyrwat ka la long shisha kaba pynduhnong ïa shibun ki paidbah ha ka thaiñ Mawkyrwat namar ba kum ha kine ki juk mynta shibun ki kam ki jam ki briew ki shaniah bad pyndonkam lyngba ki Internet la ka long ha ka khaiï pateng, ki kam ophis bad ruh wat ha ki kam ïa thied ïa pet lyngba da ki mobile phun kum ki jingïathied lyngba ki online bapher bapher bad kiwei de ki jingdonkam.
Lah ban kdew ba ka jingthut jong ka network ka long baroh ki company kata ka Jio, ka Airtel bad kumjuh ruh ka BSNL. Namarkata, ki paidbah jong ka dong ka thaiñ Mawkyrwat ba kynthup ruh ïa ka Ranikor ki la buh ka jingkyrpad ïa baroh ki company ba lada ki kwah ban pyntyllun ïa ka kam kim dei ban shu hun tang ban shim ei ïa ka pisa na ki paidbah hynrei ki dei ruh ban pynbiang ruh ïa ka rukom treikam jong ki network khnang ba ki paidbah kin nym ïa kynduh jingeh ha kaba pyndonkam ïa ki SIM CARD.
Halor kane ka jingïathut ba khah ha ka network, ki paidbah ki la ong ba ki ladon shibun ki jingsngewduhnong nalor ba ka bai thep pisa (recharge top-up) ka la rem lypa bad khlem da lap ïoh ban pyndonkam tang na ka daw jong ka jingthut ka network hynrei ynda la dei ka por ban kut watla kam da biang network ruh ki hap thep pisa biang bad kane ha teng ha teng ka pynbitar bad sngew duhnong ruh ha kawei pat ka liang. “Bunsien ka network ynda la dei ka por pynlip ka bording (light) ka network ruh ka duh lang kane ka pynthud shisha ïa ki paidbah kiba ju ai ka jingshakri lyngba ki Internet bad ki Mobile Phone”, ong ki paidbah.
