Shillong, Naitung 01: Ka khubor ba la ïoh la ïathuh ba ka ïaid ka ïeng jong ki kali ha kiba bun ki bynta ka sor Tura, ka la shah pynthut noh namar ka jingtwa khyndew ha kylleng ki jaka ha ka step sngi Nyngkong hadien ka jingther jong u slap uba jur.
La ong ba ka surok Dabasipara ba pynïasoh ïa ka Tura-Dalu, ka la shah kah lynti ha ka khyndew, kaba pyndkut syndon ïa ka jingïaid ki kali.
Kawei pat ka jingtwa khyndew ka la jia ha Upper Chandmari kaba la wanrah ïa ka jingjulor ki nongkynti. Kawei ka thuk thuk bad ka kali ki la julor ha kane ka jingjia.
Watla ym shym la don kino kino ki jingjia ba sngewsih, hynrei kawei ka ïing ha Deran Gittim, Tura, kaba don halor ka kshaid Gandrak, ka la shah rong noh ha ka khyndew kaba twa.
