Thurmur ka rukom pynmih ia ka result Staff Nurse bad ANM kynnoh ki samla ba ïaleh eksamin

Shillong, Nailur 28 : Ki samla thepkam Nurse mynta ka sngi saitjaiñ, ki la dawa na ka Sorkar Jylla ban pynmih ïa ka Result kaba shai ha ryngkat ki kyrteng, Roll Number bad ki Marks.
Kine ki samla thepkam Nurse ki la kynnoh ba ka jingpynmih ïa ka Result mynta ka sngi ha ka por 10 baje mynstep ka long kaba thurmur namar ïa ka Result la pynmih khlem kdew shai ïa ki Roll Number bad don ruh ki Roll Number kiba mih arsien.
Haba kren sha ki lad pathai khubor u samla Lurstep Nongrum ha ryngkat bad kiwei pat kiba ki thepkam Nurse ki la pynpaw ka jinglyngngoh ïa ka rukom pynmih ïa ka Result.
U samla Lurstep ula kynnoh ba ka jingpyllait ïa ka Result ka long thurmur namar ba kam shai, namar ki Roll Number kim long kiba ïaid ryntih ne ‘Serial’ bad bun ruh ki Roll Number ki jah ha ka jingpyllait ïa ka Result.
“Kane ka jingpynmih Result kam long kaba shai namar kam kdew mano ba Pass, mano ba Fail, katno ka Cut off Marks namar wat ki Roll Number kiba paw ruh ki khlem kdew, mano kiba hap ha ka Khasi-Jaintia Category, Garo Category bad Unreserved Category” la kynnoh u samla Lurstep.
U samla Lurstep ula ong, ba ka Sorkar ka dei ban pynshai halor kane ka rukom pynmih ïa ka Result bad ula kynnoh ruh ba don u Roll Number uba mih arsien.
U la kynnoh ruh ba katkum ka Advertisement, ïa ka kam Nurse yn thung katkum ka Merit List hynrei ha kane ka Result, ka khlem kdew satia ïa ka Merit List.
“Ka jingdawa jong ngi ka long ba ka Sorkar ka dei ban pynmih lut ïa ka Result namar ngi kwah tip, katno ngut don kiba ïakhun ïaka eksamin ha ryngkat ki Roll Number bad kyrteng, katno ngut kiba Pass, da katno Marks ki ïoh, bad mano ba Fail” u la ong.